වික්ටෝරියා ප්‍රාන්තයේ 39 හැවිරිදි childcare worker කෙනෙකු Facebook දැන්වීමක් හරහා සිදුවූ මූල්‍ය වංචාවකට හසුවීමෙන් මාස හයක් ඇතුළත ඩොලර් 20,000කට වැඩි මුදලක් අහිමි කරගෙන තිබෙනවා.

Ashley Grey නමැති මෙම කාන්තාව මාර්තු මාසයේදී Facebook ඔස්සේ දුටු අමතර ආදායමක් උපයාගත හැකි බව සඳහන් දැන්වීමක් මත ක්ලික් කිරීමෙන් පසුව මෙම වංචාවට හසුව ඇති බව වාර්තා වනවා.

Affiliate Marketing නමින් හඳුන්වා දුන් මෙම ව්‍යාජ ආදායම් වැඩසටහන හරහා වැඩි මුදලක් උපයාගැනීමට නම් මුලින් මුදල් ආයෝජනය කළ යුතු බව පවසමින් වංචාකරුවන් ඇයගෙන් දිගින් දිගටම මුදල් ලබාගෙන තිබෙනවා.

ඒ සඳහා Cryptocurrency ගිණුමක් භාවිත කර ඇති අතර, වංචාකරුවන් ඇයගේ ගිණුම් පිවිසුම් තොරතුරු ද ලබාගෙන ඇති බව සඳහන්.

Centrelink සහ WorkCover හරහා ලැබුණු මුදල් ද මෙලෙස අහිමි කරගෙන ඇති ඇය, මේ වනවිට මිතුරන්ට සහ පවුලේ සාමාජිකයන්ට ඩොලර් 12,000කට ආසන්න මුදලක් ණය වී සිටින බවයි ප්‍රකාශ කර ඇත්තේ.

මුදල් යැවීම නතර කළ ද වංචාකරුවන් තවදුරටත් දිනපතා ඇයට පණිවිඩ එවා ඇති අතර, මීළඟ Centrelink ගෙවීමෙන් තවත් ඩොලර් 500ක් ලබාදෙන ලෙස ද ඉල්ලා තිබෙනවා.

මේ අතර ඔස්ට්‍රේලියාවේ National Anti-Scam Centre ආයතනය පෙන්වා දෙන්නේ මෙවැනි වංචා Task-Based Job Scams ලෙස හඳුන්වන අතර, සැබෑ රැකියා අවස්ථා ලෙස පෙනී සිටිමින් පුද්ගලයන්ගෙන් මුදල් ලබාගැනීම මෙහි ප්‍රධාන අරමුණ බවයි.

අන්තර්ජාලය ඔස්සේ රැකියා හෝ ආදායම් අවස්ථා ලබාදෙන බව පවසා මුලින් මුදල් තැන්පත් කරන ලෙස ඉල්ලන පුද්ගලයන් පිළිබඳව විශේෂයෙන් සැලකිලිමත් වන ලෙසයි ජනතාවට උපදෙස් ලබා දී ඇත්තේ.