ඔස්ට්‍රේලියාවේ පළමු නිවස මිලදී ගැනීම සඳහා Superannuation විශ්‍රාම ඉතුරුම් මුදල් කලින් ලබාගැනීමට අවසර දීමේ යෝජනාව සම්බන්ධයෙන් ලිබරල් පක්ෂය තුළ මතභේදයක් මතුව තිබෙනවා.

ලිබරල් පක්ෂයේ පාර්ලිමේන්තු මන්ත්‍රී Garth Hamilton ප්‍රකාශ කර ඇත්තේ, ජනතාවගේ විශ්‍රාම දිවියේ මූල්‍ය ආරක්ෂාවට ප්‍රමුඛත්වය ලබාදිය යුතු බැවින් Superannuation ක්‍රමයේ දැනට පවතින නීති වෙනස් නොකළ යුතු බවයි.

පසුගිය ෆෙඩරල් මැතිවරණ දෙකේදී ලිබරල් සහ නැෂනල් පක්ෂ සන්ධානය, first home buyersලාට සිය Superannuation ගිණුමෙන් ඩොලර් 50,000ක් දක්වා ලබාගැනීමට අවසර දෙන ප්‍රතිපත්තියක් ඉදිරිපත් කර තිබුණා.

කෙසේ වෙතත්, වර්තමානයේ ලිබරල් පක්ෂයේ Shadow Housing Minister Andrew Bragg සහ Shadow Treasurer Tim Wilson ඇතුළු නායකයන් කිහිපදෙනෙකු නිවාස මිලදී ගැනීම සඳහා Superannuation මුදල් භාවිත කළ හැකි විකල්ප ක්‍රම සලකා බැලිය යුතු බවට අදහස් පළකර තිබෙනවා.

එහෙත් Garth Hamilton පවසන්නේ, විශ්‍රාම ඉතුරුම් ආයෝජනය කිරීම, බදු අය කිරීම හෝ මුදල් ලබාගැනීම සම්බන්ධයෙන් දැනට පවතින ක්‍රමවේද කිසිවක් වෙනස් නොකළ යුතු බවයි.

මෙම ස්ථාවරයට ලිබරල් පක්ෂයේ පාර්ලිමේන්තු කණ්ඩායමේ බහුතර සහාය තමන්ට ඇති බවට විශ්වාස කරන Hamilton, ඒ සම්බන්ධයෙන් විපක්ෂ නායක Angus Taylor සමඟ ද සාකච්ඡා කර ඇති බව සඳහන් කරනවා.

මේ අතර One Nation පක්ෂය වෙනස් යෝජනාවක් ඉදිරිපත් කරමින්, නිවාස ණය හෝ කුලී ගෙවන ජනතාවට සහනයක් ලෙස වසර තුනක කාලයක් සඳහා වැටුපෙන් Superannuation වෙත යොමුකරන දායකත්වයෙන් හතරෙන් එකක්, එනම් වැටුපෙන් සියයට 3ක්, සෘජුව අතට ලැබෙන ආදායමට එකතු කිරීමට යෝජනා කර තිබෙනවා.

කෙසේ වෙතත්, Superannuation සම්බන්ධයෙන් ලිබරල් පක්ෂය මෙතෙක් නව නිල ප්‍රතිපත්තියක් ප්‍රකාශයට පත්කර නොමැති අතර, විශ්‍රාම ඉතුරුම් ආරක්ෂා කිරීම සහ ජනතාවට නිවාස හිමිකාරිත්වය ලබාගැනීමට සහාය වීම අතර සමබරතාව පිළිබඳ සාකච්ඡාව තවදුරටත් පවතිනවා.