වික්ටෝරියා ප්‍රාන්ත මැතිවරණයට One Nation පක්ෂයෙන් Melbourne ආසනය සඳහා ඉදිරිපත් වීමට නියමිතව සිටි Matthew Collins සිය අපේක්ෂකත්වයෙන් ඉල්ලා අස්වී තිබෙනවා.

ඒ, ඔහුගේ පැරණි සමාජ මාධ්‍ය ගිණුම්වල පළ කර තිබූ ලිංගික කරුණු ඇතුළත් සහ කාන්තාවන් සම්බන්ධයෙන් අපහාසාත්මක ප්‍රකාශ කිහිපයක් නැවත කරළියට පැමිණීමත් සමඟයි.

විශේෂයෙන්ම කාන්තාවකගෙන් ලිංගික සම්බන්ධතාවයකට කැමැත්ත විමසීම අවශ්‍ය නොවන බවට පළ කර තිබූ සමාජ මාධ්‍ය සටහනක් සම්බන්ධයෙන් ඔහු දැඩි විවේචනයට ලක්ව තිබෙනවා.

මුස්ලිම් ජනතාව සම්බන්ධයෙන් ද අපහාසාත්මක ප්‍රකාශ ඔහුගේ පැරණි සමාජ මාධ්‍ය පළ කිරීම් අතර තිබූ බවයි පැවසෙන්නේ.

මෙම සිදුවීම සම්බන්ධයෙන් ප්‍රතිචාර දක්වමින් One Nation පක්ෂය පවසා ඇත්තේ එවැනි ප්‍රකාශ තම පක්ෂය කිසිසේත් අනුමත නොකරන බවයි.

ඒ අනුව Matthew Collins ගේ ඉල්ලා අස්වීම පක්ෂය විසින් පිළිගෙන තිබෙන බව වාර්තා වනවා.

තමන් අතීතයේ කළ ප්‍රකාශ පිළිබඳව කනගාටු වන බවත්, ඒවා පිළිගත නොහැකි ප්‍රකාශ බවත් Matthew Collins ප්‍රකාශයක් නිකුත් කරමින් ජනතාවගෙන් සමාව ඉල්ලා තිබෙනවා.

නොවැම්බර් 28 වැනිදා පැවැත්වීමට නියමිත වික්ටෝරියා ප්‍රාන්ත මැතිවරණයට පෙර සිදුවූ මෙම ඉල්ලා අස්වීමත් සමඟ Melbourne ආසනය සඳහා නව අපේක්ෂකයෙකු නම් කිරීම පිළිබඳව One Nation පක්ෂය තීරණයක් ගෙන නොමැති බවයි වාර්තා වෙන්නේ.