ඔස්ට්‍රේලියාවේ කාන්තාවන්ට මාසික ඔසප් වේදනාව ඇතුළු ප්‍රජනක සෞඛ්‍ය ගැටලු සඳහා වසරකට අමතර වැටුප් සහිත නිවාඩු දින 10ක් ලබාදීමේ යෝජනාවක් පිළිබඳව ෆෙඩරල් මට්ටමින් අවධානය යොමුව තිබෙනවා.

ඔස්ට්‍රේලියාවේ National Employment Standards හෙවත් ජාතික රැකියා ප්‍රමිතීන් සමාලෝචනය කරන ෆෙඩරල් පාර්ලිමේන්තු විමර්ශනයකට වෘත්තීය සමිති, නීතිඥයන් සහ සේවක අයිතිවාසිකම් වෙනුවෙන් පෙනී සිටින සංවිධාන මෙම යෝජනාව ඉදිරිපත් කර තිබෙනවා.

ඒ අනුව දැනට පවතින වැටුප් සහිත Sick Leave දින 10ට අමතරව, වසරකට වෙනම Reproductive Health Leave දින 10ක් ලබාදිය යුතු බව ඔවුන්ගේ ඉල්ලීමයි.

මෙම නිවාඩු ඔසප් වේදනාව, ගබ්සා වීම්, දරු පිළිසිඳ ගැනීමේ ප්‍රතිකාර, Endometriosis සහ ආර්තවහරණය වැනි සෞඛ්‍ය තත්ත්වයන් සඳහා භාවිත කළ හැකි ලෙස හඳුන්වාදීමට යෝජනා වී තිබෙනවා.

එමෙන්ම පුරුෂයන්ට ද ප්‍රජනක සෞඛ්‍යයට අදාළ ඇතැම් ප්‍රතිකාර සහ වෛද්‍ය පරීක්ෂණ සඳහා මෙම නිවාඩු ලබාගත හැකි ලෙස යෝජනාව සකස් කර තිබෙනවා.

Queensland ප්‍රාන්තයේ රාජ්‍ය අංශයේ සේවකයන් 320,000කට පමණ 2024 වසරේ සිටම වසරකට වැටුප් සහිත Reproductive Health Leave දින 10ක් ලබාගැනීමේ පහසුකම පවතිනවා.

මෙම අයිතිය ඔස්ට්‍රේලියාවේ සියලුම සේවකයන්ට ලබාදිය යුතු බවටයි වෘත්තීය සමිති ඉල්ලා සිටින්නේ.

මේ අතර Bankwest Curtin Economics Centre ආයතනය සිදුකළ ආර්ථික ඇස්තමේන්තුවකට අනුව, ප්‍රජනක සෞඛ්‍ය ගැටලු හේතුවෙන් සේවකයන්ගේ නොපැමිණීම සහ වැඩ කිරීමේ කාර්යක්ෂමතාව අඩුවීම නිසා ඔස්ට්‍රේලියානු ආර්ථිකයට වසරකට ඩොලර් බිලියන 21.3ක පමණ බලපෑමක් සිදුවන බව සඳහන්.

කෙසේ වෙතත් Australian Chamber of Commerce and Industry ආයතනය පෙන්වා දෙන්නේ අමතර වැටුප් සහිත නිවාඩු හඳුන්වාදීමෙන් කුඩා ව්‍යාපාරවලට තවත් මූල්‍ය බරක් ඇතිවිය හැකි බවයි.

ඒ වෙනුවට දැනට පවතින නිවාඩු හිමිකම් සහ නම්‍යශීලී සේවා ක්‍රමවේද භාවිත කිරීම වඩාත් සුදුසු බව එම සංවිධානයේ අදහසයි.

මෙම යෝජනාව මෙතෙක් ජාතික නීතියක් බවට පත්වී නොමැති අතර, ෆෙඩරල් විමර්ශනයේ නිර්දේශ 2026 වසර අවසන් වීමට පෙර නිකුත් කිරීමට අපේක්ෂා කරනවා.