ඔස්ට්‍රේලියාවේ වික්ටෝරියා ප්‍රාන්තයේ Shepparton නගරයේ රාජකාරියෙන් බැහැරව සිටි 19 හැවිරිදි පොලිස් නිලධාරියෙකුට සහ ඔහුගේ මිතුරෙකුට පහරදීමේ සිද්ධියක් සම්බන්ධයෙන් පුද්ගලයන් අටදෙනෙකු අත්අඩංගුවට ගෙන ඇති බව Victoria පොලිසීය ඊයේ (02) අනාවරණය කර තිබෙනවා.

පසුගිය ඔක්තෝබර් 25 වැනිදා අලුයම 12.30ට පමණ Maude Street ප්‍රදේශයේ යතුරුපැදියක් අනතුරුදායක ලෙස ධාවනය කරමින් සිටි පුද්ගලයෙකුට එම ස්ථානයෙන් ඉවත්ව යන ලෙස අදාළ පොලිස් නිලධාරියා දැනුම්දීමෙන් පසු, ඔහුට හා ඔහු සමග සිටි මිතුරෙකුට පිරිමි පුද්ගලයන් පිරිසක් විසින් වටකරගෙන පහර දී ඇති බවයි වාර්තා වන්නේ.

තුවාල ලැබූ දෙදෙනා රෝහල්ගත කර ඇති අතර, මේ වනවිට දෙදෙනාම රෝහලෙන් පිටව ගොස් ඇති බවත් පොලිසිය සඳහන් කරනවා.

සිද්ධිය සම්බන්ධයෙන් ඔක්තෝබර් 29 වැනිදා Greater Shepparton ප්‍රදේශයේ ස්ථාන අටක් සෝදිසි කළ පොලිසිය වයස අවුරුදු 16ත් 18ත් අතර හයදෙනෙකු අත්අඩංගුවට ගෙන ඇති අතර, ඔවුන්ට අධිකරණ කැඳවීම මගින් චෝදනා ඉදිරිපත් කිරීමට අපේක්ෂා කරන බවයි වාර්තා වන්නේ.

මීට අමතරව 20 හැවිරිදි තරුණයෙකු අත්අඩංගුවට ගෙන පසුව මුදාහැර ඇති අතර, ඔක්තෝබර් 30 වැනිදා තවත් 17 හැවිරිදි පිරිමි ළමයෙකුගෙන් ප්‍රශ්න කිරීමෙන් අනතුරුව ඔහුව ද මුදාහැර තිබෙනවා.

විමර්ශනවලදී ජංගම දුරකථන, යතුරුපැදියක් සහ ව්‍යාජ ගිනි අවියක් පොලිස් භාරයට ගෙන ඇති අතර, පසුගිය දිනවල සිදුකළ අත්අඩංගුවට ගැනීම් පිළිබඳ තොරතුරු ඊයේ ප්‍රසිද්ධ කරමින් පොලිසිය සඳහන් කරන්නේ වැඩිදුර විමර්ශන ක්‍රියාත්මක බවයි.