ඔස්ට්‍රේලියාවේ Queensland ප්‍රාන්තයේ Mater රෝහල් ජාලය සිය වෛද්‍ය රසායනාගාර පරීක්ෂණ සේවා, බාහිර ආයතන වෙත පැවරීමට ගත් තීරණයක් හේතුවෙන් සේවක තනතුරු 400කට වැඩි සංඛ්‍යාවකට බලපෑම් එල්ල වන බව වාර්තා වෙනවා.

Brisbane සහ Springfield ප්‍රදේශවල පිහිටි Mater රෝහල්වල සේවය කරන පූර්ණකාලීන සහ අර්ධකාලීන සේවකයන් මෙම තීරණයෙන් බලපෑමට ලක්වන බවයි වාර්තා වන්නේ.

ඒ අනුව, ඉදිරි මාස දෙක තුළ තනතුරු 100කට වැඩි සංඛ්‍යාවක් අහිමි වීමට නියමිත අතර, ඉතිරි තනතුරු බොහොමයක් පිළිබද තීරණය 2027 වසරේදී ගනු ඇති බවයි වාර්තා වන්නේ.

පසුගිය දශකය තුළ වෛද්‍ය සේවා පවත්වාගෙන යාමේ වියදම් ඉහළ ගියද, Medicare සහනාධාර ඊට සරිලන ලෙස ඉහළ නොයාම මෙම තීරණයට හේතු වී ඇති බවයි Mater ආයතනය පවසන්නේ.

නව ක්‍රමවේදය යටතේ Brisbane සහ Springfield රෝහල්වල රසායනාගාර පරීක්ෂණ සේවා Sullivan Nicolaides Pathology සහ Pathology Queensland ඇතුළු විශේෂිත බාහිර ආයතන මගින් සැපයීමට නියමිතව තිබෙනවා.

කෙසේ වෙතත්, දැනටමත් බාහිර රසායනාගාර සේවා සපයන්නන් භාවිත කරන Townsville, Mackay, Rockhampton, Bundaberg සහ Gold Coast ප්‍රදේශවල පිහිටි Mater රෝහල්වලට මෙම වෙනස බලපාන්නේ නැහැ.

මෙම තීරණය හේතුවෙන් රෝගීන්ට ලබාදෙන වෛද්‍ය ප්‍රතිකාරවල ගුණාත්මකභාවයට බලපෑමක් සිදු නොවන බවත්, නව ක්‍රමය මගින් රෝගී සත්කාර සඳහා වැඩි සම්පත් ප්‍රමාණයක් යොමු කිරීමට හැකිවන බවත් එම ආයතනය සඳහන් කරනවා.

එමෙන්ම, මෙම තීරණය සේවකයන්ගේ දක්ෂතාව, වෘත්තීයභාවය හෝ කැපවීම පිළිබඳ ගැටලුවක් හේතුවෙන් ගනු ලැබූවක් නොවන බව අවධාරණය කරමින්, ඔවුන් ලබාදුන් සේවය වෙනුවෙන් Mater ආයතනය සිය කෘතඥතාව පළකර තිබෙනවා.