ඔස්ට්‍රේලියාවේ සේවකයන්ට සතියකට දින හතරක් පමණක් වැඩ කරමින්, සම්පූර්ණ වැටුප ලබාගැනීමට අවස්ථාව සැලසීමේ යෝජනාවක් පිළිබඳව මේ වන විට අවධානය යොමුව තිබෙනවා.

මෙම යෝජනාව National Employment Standards සම්බන්ධයෙන් සිදුකරන පාර්ලිමේන්තු විමර්ශනය යටතේ සලකා බැලෙන අතර, Unions NSW ඇතුළු වෘත්තීය සමිති කෙටි වැඩ සතියක් හඳුන්වාදෙන ලෙස බලපෑම් කරමින් සිටිනවා.

Unions NSW නවතම සමීක්ෂණයකට අනුව, ඔස්ට්‍රේලියානු සේවකයන්ගෙන් 88%ක් සෑම සතියකම වැටුප් නොලබන අතිරේක වැඩවල නිරත වන අතර, සාමාන්‍යයෙන් සතියකට පැය 7.8ක පමණ අමතර වැඩක් සිදුකරන බව හෙළි වී තිබෙනවා.

වෘත්තීය සමිති යෝජනා කරන්නේ දැනට සතියකට පැය 38ක් වන සාමාන්‍ය වැඩ කාලය පැය 35ක් දක්වා අඩු කර, හැකි ක්ෂේත්‍රවල දින හතරක වැඩ සතියක් හඳුන්වාදිය යුතු බවයි.

මෙහිදී සේවකයන්ගේ වැටුප්, අතිකාල දීමනා සහ අනෙකුත් සේවා කොන්දේසි අඩු නොකළ යුතු බවත් ඔවුන් අවධාරණය කරනවා.

විදෙස් රටවල සහ ඔස්ට්‍රේලියාවේ සිදුකළ අත්හදා බැලීම් කිහිපයකින් සේවක සතුට, මානසික සෞඛ්‍යය සහ වැඩ කාර්යක්ෂමතාව වැඩිවීමේ ප්‍රතිඵල පෙන්වා තිබුණත්, එහි දිගුකාලීන ඵලදායිතාව සහ සියලු ක්ෂේත්‍රවලට ගැළපීම පිළිබඳ තවදුරටත් අධ්‍යයනය කළ යුතු බව පාර්ලිමේන්තු පර්යේෂණ වාර්තාව පෙන්වා දෙනවා.

කෙසේ වෙතත්, මෙම යෝජනාව තවමත් සාකච්ඡා සහ විමර්ශන මට්ටමේ පවතින අතර, ඔස්ට්‍රේලියාව පුරා දින හතරක වැඩ සතියක් ක්‍රියාත්මක කිරීමට අවසන් තීරණයක් ගෙන නැහැ.