ඔස්ට්‍රේලියාවේ Training Visa හෙවත් Subclass 407 වීසා සඳහා අයදුම් කරන පුද්ගලයන්ට නොවැම්බර් 12 වැනිදා සිට නව සංක්‍රමණ නීති ක්‍රියාත්මක වීමට නියමිතයි.

Department of Home Affairs විසින් හඳුන්වා දී ඇති මෙම නව නීති අනුව, Training Visa සඳහා අයදුම් කරන පුද්ගලයන් අයදුම්පත ඉදිරිපත් කරන අවස්ථාවේදී මෙන්ම වීසා අනුමත කරන අවස්ථාවේදීත් ඔස්ට්‍රේලියාවෙන් පිටත සිටිය යුතු වනවා.

ඒ අනුව නොවැම්බර් 12 වැනිදා සිට ඔස්ට්‍රේලියාව තුළ සිට ඉදිරිපත් කරන Subclass 407 වීසා අයදුම්පත් වලංගු නොවන අයදුම්පත් බවට පත්වනවා.

විශේෂයෙන්ම දැනට ඔස්ට්‍රේලියාවේ වෙනත් වීසා යටතේ රැඳී සිටින පුද්ගලයන්ට ඔස්ට්‍රේලියාව තුළ සිටම Training Visa සඳහා අයදුම් කිරීමට තිබූ අවස්ථාව මෙමඟින් සීමා වනවා.

කෙසේ වෙතත්, නොවැම්බර් 12 වැනිදාට පෙර නිසි ලෙස ඉදිරිපත් කර ඇති අයදුම්පත් සඳහා මෙම නව නීති බලපාන්නේ නැහැ.

මෙම වීසා කාණ්ඩය යටතේ සේවා ස්ථාන ආශ්‍රිත පුහුණුවක් ලබාගැනීම, වෘත්තීය කුසලතා වැඩිදියුණු කරගැනීම සහ වෘත්තීය සංවර්ධන වැඩසටහන්වලට සහභාගී වීම සඳහා අවස්ථාව සැලසෙනවා.

මෙම සංශෝධනයේ ප්‍රධාන අරමුණ වන්නේ Training Visa භාවිත කරමින් ඔස්ට්‍රේලියාව තුළ අඛණ්ඩව තාවකාලික වීසා ලබාගනිමින් රැඳී සිටීමේ අවස්ථා සීමා කිරීමයි.