බ්‍රිතාන්‍යයේ සේවය කරන විදේශිකයන් ඇතුළු සංක්‍රමණිකයන්ට ස්ථිර පදිංචිය ලබාගැනීම සඳහා දැනට පවතින වසර 5ක අවම කාලය වසර 10ක් දක්වා දීර්ඝ කිරීමේ නව සංක්‍රමණික ප්‍රතිසංස්කරණ මාලාවක් එරට රජය ප්‍රකාශයට පත්කර තිබෙනවා.

බ්‍රිතාන්‍ය ස්වදේශ කටයුතු ලේකම් Shabana Mahmood විසින් නොවැම්බර් 2 වැනිදා පාර්ලිමේන්තුවට ඉදිරිපත් කළ Earned Settlement ප්‍රතිපත්තිය යටතේයි මෙම වෙනස්කම් යෝජනා කර ඇත්තේ.

නව යෝජනාවලට අනුව, බ්‍රිතාන්‍යයේ ස්ථිර පදිංචිය හෙවත් Indefinite Leave to Remain (ILR) ලබාගැනීම සඳහා එරට ජීවත් වූ කාලය පමණක් නොව, ආදායම, රැකියාව, ඉංග්‍රීසි භාෂා ප්‍රවීණතාව, සංක්‍රමණික නීති පිළිපැදීම සහ රටට ලබාදුන් ආර්ථික දායකත්වය ද සැලකිල්ලට ගැනීමට නියමිතයි.

ඒ අනුව වාර්ෂිකව පවුම් 50,000කට අඩු ආදායමක් ලබන බොහෝ විදේශීය සේවකයන්ට ස්ථිර පදිංචිය සඳහා වසර 10ක් බලාසිටීමට සිදුවිය හැකි අතර, පවුම් 50,000කට වැඩි ආදායමක් ලබන පුද්ගලයන්ට සහ වෛද්‍යවරුන්, හෙදියන් හා ගුරුවරුන් වැනි සුදුසුකම් ලබන රාජ්‍ය සේවකයන්ට වසර 5කින් ස්ථිර පදිංචිය සඳහා අයදුම් කිරීමේ අවස්ථාව හිමිවිය හැකියි.

වාර්ෂිකව පවුම් 125,000කට වැඩි ආදායමක් ලබන ඉහළ ආදායම්ලාභීන්ට සහ ඇතැම් විශේෂ කුසලතා වීසා හිමියන්ට වසර තුනකින් ස්ථිර පදිංචිය සඳහා සුදුසුකම් ලැබීමට ද යෝජනා කර තිබෙනවා.

මේ අතර, නීතිවිරෝධී මාර්ගවලින් බ්‍රිතාන්‍යයට පැමිණි ඇතැම් සරණාගතයන්ට ස්ථිර පදිංචිය ලබාගැනීම සඳහා වසර 20ත් 30ත් අතර කාලයක් බලාසිටීමට සිදුවිය හැකි බව ද වාර්තා වනවා.

කෙසේ වෙතත්, 2025 මැයි මාසයට පෙර බ්‍රිතාන්‍යයට පැමිණි ඇතැම් Care Workers සඳහා වසර 5ක ස්ථිර පදිංචි මාර්ගය පවත්වාගෙන යාමට විශේෂ සහන ලබාදීමට ද යෝජනා කර තිබෙනවා.

නව ප්‍රතිපත්තිය යටතේ ස්ථිර පදිංචිය සඳහා අයදුම්කරුවන්ට ඉහළ ඉංග්‍රීසි භාෂා ප්‍රවීණතාවක්, අවම වශයෙන් වසර තුනක National Insurance දායකත්වයක් සහ රජයට ගෙවිය යුතු හිඟ මුදල් නොමැති බව ඇතුළු කොන්දේසි සපුරාලීමට සිදුවිය හැකියි.

බ්‍රිතාන්‍ය ස්වදේශ කටයුතු අමාත්‍යාංශයේ ඇස්තමේන්තු අනුව, මෙම වෙනස්කම් හේතුවෙන් සංක්‍රමණිකයන් ලක්ෂ 5කට වැඩි පිරිසකට ස්ථිර පදිංචිය ලබාගැනීම සඳහා වසර 5කට වඩා වැඩි කාලයක් බලාසිටීමට සිදුවිය හැකියි.

මෙම ප්‍රතිසංස්කරණ 2027 වසරේදී ක්‍රියාත්මක කිරීමට අපේක්ෂා කරන අතර, දැනටමත් ස්ථිර පදිංචිය ලබාගෙන සිටින පුද්ගලයන්ගේ එම තත්ත්වය අහෝසි නොකරන බව ද රජය ප්‍රකාශ කර තිබෙනවා.

කෙසේ වෙතත්, නව නීති තවමත් ක්‍රියාත්මක වී නොමැති අතර, අවසන් නීති සහ අදාළ සංක්‍රාන්ති විධිවිධාන ප්‍රකාශයට පත්කිරීමෙන් පසුව එක් එක් වීසා කාණ්ඩයට ඇති බලපෑම නිශ්චිතව තීරණය වනු ඇති.