Melbourne හි Footscray ප්‍රදේශයේ අඩු ආදායම්ලාභී සහ අවශ්‍යතා ඇති පුද්ගලයන්ට නොමිලේ ආහාර ලබාදුන් Lighthouse Cafe ආයතනය තාවකාලිකව වසා දැමීමට Salvation Army පියවර ගෙන තිබෙනවා.

එම ආයතනය විවෘත කර මාස පහක් වැනි කෙටි කාලයක් තුළ පැමිණෙන පිරිස අපේක්ෂා කළ ප්‍රමාණයට වඩා විශාල ලෙස ඉහළ යාම ඊට හේතුවයි.

ආරම්භයේදී දිනකට පුද්ගලයන් 50ත් 60ත් අතර පිරිසක් පැමිණෙනු ඇතැයි අපේක්ෂා කළත්, මේ වන විට දිනකට සාමාන්‍යයෙන් පුද්ගලයන් 170ක් පමණ එහි පැමිණ තිබෙනවා.

එහෙත් එම ආපනශාලාවේ තිබූ එක් කාමරයකින් එකවර පහසුකම් සැලසිය හැකි වී ඇත්තේ පැමිණෙන පිරිසෙන් අඩකටත් අඩු ප්‍රමාණයකටයි.

ඒ අනුව වැඩි පිරිසකට සේවා සැලසිය හැකි සහ වෙනත් සමාජ සේවා ද එකම ස්ථානයකින් ලබාගත හැකි නව ස්ථානයක් සොයා ගැනීමට Salvation Army කටයුතු කරමින් සිටිනවා.

මෙම සේවාව ලබාගත් පුද්ගලයන් ආපනශාලාව වසා දැමීම පිළිබඳ කනස්සල්ල පළ කර ඇති අතර, එය තමන්ට අත්‍යවශ්‍ය සහනයක් වූ බව ද සඳහන් කර තිබෙනවා.

නව ස්ථානයක් සොයා ගන්නා තෙක් මේ මාසයේ අග භාගයේ සිට ජංගම ආහාර සහ සහාය සේවාවක් ආරම්භ කිරීමටත්, Footscray ප්‍රදේශයේම මෙම සේවාව නැවත පවත්වාගෙන යාමටත් Salvation Army සැලසුම් කර තිබෙනවා.