ඔස්ට්‍රේලියාවේ Uber සමාගමට නිව් සවුත් වේල්ස් ප්‍රාන්ත රජය වෙත ඩොලර් මිලියන 81කට අධික Payroll Tax මුදලක් ගෙවීමට සිදුවන බව මහාධිකරණය (High Court of Australia) අද තීන්දු කර තිබෙනවා.

Uber රියදුරන්ට ගෙවනු ලබන ගාස්තු Payroll Tax නීතිය යටතේ වැටුප් ලෙස සැලකිය හැකි බවට අධිකරණය බහුතර තීන්දුවකින් තීරණය කිරීමත් සමඟ මෙම නියෝගය නිකුත් කරනු ලැබුවා.

2015 සිට 2020 දක්වා මූල්‍ය වර්ෂවලදී Uber රියදුරන්ට ගෙවූ මුදල් සම්බන්ධයෙන් නිව් සවුත් වේල්ස් බදු අධිකාරිය විසින් ඩොලර් මිලියන 81.5කට ආසන්න බදු තක්සේරුවක් නිකුත් කර තිබුණා.

කෙසේ වෙතත්, Uber සමාගම අධිකරණය හමුවේ තර්ක කර තිබුණේ තමන් මගීන්ගෙන් මුදල් එකතු කර සේවා ගාස්තුව අඩු කිරීමෙන් පසු ඉතිරි මුදල රියදුරන් වෙත ලබාදෙන අතරමැදි ගෙවීම් නියෝජිතයෙකු පමණක් බවයි.

එබැවින් එම ගෙවීම් සාමාන්‍ය සේවක වැටුප් ලෙස සලකා Payroll Tax අය කිරීම නීත්‍යනුකූල නොවන බවට Uber සමාගම තර්ක කළද, මහාධිකරණය එම අභියාචනය ප්‍රතික්ෂේප කර තිබෙනවා.

අදාළ නීතිය අනුව Uber සහ රියදුරන් අතර පවතින ගිවිසුම් යටතේ රියදුරන්ට ගෙවනු ලබන මුදල් Payroll Tax සඳහා වැටුප් ලෙස සැලකිය හැකි බවයි අධිකරණය තීරණය කර ඇත්තේ.

මෙම නඩුවට අදාළ නිව් සවුත් වේල්ස් ප්‍රාන්ත බදු කොමසාරිස්වරයාගේ නීති වියදම්ද Uber සමාගම විසින් ගෙවිය යුතු බවට නියෝග කර තිබෙනවා.

මේ අතර, මෙම ඓතිහාසික තීන්දුව Uber සමාගමට පමණක් නොව, Uber Eats, DoorDash සහ අනෙකුත් ඩිජිටල් වේදිකා හරහා ස්වාධීන කොන්ත්‍රාත්කරුවන් සමඟ කටයුතු කරන ව්‍යාපාරවලටද ඉදිරියේදී බලපෑම් ඇති කළ හැකි බව නීති විශේෂඥයන් පෙන්වා දෙනවා.

කෙසේ වෙතත්, මෙම තීන්දුවෙන් සියලුම Uber රියදුරන් ස්ථිර සේවකයන් බවට පත්වන බවක් අදහස් නොවන අතර, එය නිව් සවුත් වේල්ස් ප්‍රාන්තයේ Payroll Tax නීතිය යටතේ බදු වගකීම් සම්බන්ධයෙන් ලබාදුන් තීන්දුවක් වනවා.