ශරීරයේ බර අඩු කිරීම සඳහා භාවිත කරන Wegovy ඖෂධය පෙත්තක් ලෙස ලබාදීමට ඔස්ට්‍රේලියානු ඖෂධ නියාමන අධිකාරිය (TGA) නිල අනුමැතිය ලබාදී තිබෙනවා.

මෙම අනුමැතියත් සමඟ බර පාලනය සඳහා නිර්දේශිත GLP-1 ඖෂධයක් පෙති ආකාරයෙන් භාවිත කිරීමට ඔස්ට්‍රේලියාව තුළ නව අවස්ථාවක් විවෘත වී තිබෙනවා.

ඩෙන්මාර්කයේ Novo Nordisk සමාගම විසින් නිෂ්පාදනය කරන මෙම ඖෂධය මීට පෙර ඔස්ට්‍රේලියාවේ බර පාලනය සඳහා ලබාගත හැකි වූයේ සතිපතා ලබාදෙන එන්නතක් ලෙසයි.

නව අනුමැතිය යටතේ Wegovy පෙති මිලිග්‍රෑම් 1.5, 4, 9 සහ 25 යන මාත්‍රා හතරකින් ලබාදීමට අවසර හිමිව තිබෙනවා.

මෙම ඖෂධය ශරීරයේ ආහාර ජීර්ණ ක්‍රියාවලිය මන්දගාමී කරමින් කුසගින්න අඩු කිරීමට සහ ආහාර ගැනීමෙන් පසු පිරුණු බවක් දැනීමට උපකාරී වන බවයි වෛද්‍යවරුන් පෙන්වා දෙන්නේ.

කෙසේ වෙතත්, සතිපතා ලබාදෙන Wegovy එන්නත මෙන් නොව නව ඖෂධ පෙත්ත දිනපතා උදෑසන හිස් බඩ ලබාගත යුතු අතර, එය ජලය කෝප්ප භාගයක් සමඟ ගිලීමෙන් පසු අවම වශයෙන් විනාඩි 30ක් ආහාර හෝ වෙනත් පාන වර්ග ගැනීමෙන් වැළකී සිටිය යුතුයි.

මෙම උපදෙස් නිසි ලෙස අනුගමනය නොකළහොත් ඖෂධය ශරීරයට අවශෝෂණය වන ප්‍රමාණය අඩුවිය හැකි බවට වෛද්‍යවරුන් අනතුරු අඟවනවා.

තරබාරුකමෙන් පෙළෙන සහ බර හා සම්බන්ධ සෞඛ්‍ය ගැටලු ඇති සුදුසුකම් ලබන පුද්ගලයන් සඳහා වෛද්‍ය නිර්දේශය මත මෙම ඖෂධය භාවිත කිරීමට හැකි වනු ඇති.

මේ අතර Novo Nordisk සමාගම පවසන්නේ 2026 වසර අවසන් වීමට පෙර නව Wegovy පෙත්ත ඔස්ට්‍රේලියානු වෙළෙඳපොළට හඳුන්වාදීමට කටයුතු කරමින් සිටින බවයි.

ඒ අනුව නත්තලට පෙර මෙම ඖෂධය ලබාගත හැකි වනු ඇතැයි අපේක්ෂා කළද, නිශ්චිත දිනයක් හෝ ඔස්ට්‍රේලියාවේ අලෙවි මිලක් මෙතෙක් ප්‍රකාශයට පත්කර නැහැ.

කෙසේ වෙතත්, මෙය වෛද්‍ය නිර්දේශයක් යටතේ පමණක් භාවිත කළ යුතු ඖෂධයක් වන අතර, ඔක්කාරය, වමනය සහ ආහාර ජීර්ණ පද්ධතිය ආශ්‍රිත අතුරු ආබාධ ඇතිවිය හැකි බැවින් වෛද්‍ය උපදෙස් නොමැතිව භාවිත කිරීම සුදුසු නොවන බව සෞඛ්‍ය විශේෂඥයන් අවධාරණය කරනවා.