ඔස්ට්‍රේලියානු ජනතාවගේ ගෘහස්ථ වියදම් සැප්තැම්බර් මාසයේදී යළි ඉහළ ගොස් ඇති අතර, ඒ සඳහා ඉන්ධන මිල සහ සෞඛ්‍ය සේවා වියදම් ඉහළ යාම ප්‍රධාන වශයෙන් බලපා ඇති බව නවතම රාජ්‍ය සංඛ්‍යාලේඛන පෙන්වා දෙනවා.

ඔස්ට්‍රේලියානු සංඛ්‍යාලේඛන කාර්යාංශය (ABS) අද නිකුත් කළ වාර්තාවට අනුව, 2026 සැප්තැම්බර් මාසයේදී ගෘහස්ථ වියදම් සියයට 0.6කින් ඉහළ ගොස් තිබෙනවා.

ඒ අගෝස්තු මාසයේදී වාර්තා වූ සියයට 0.1ක පහත වැටීමෙන් අනතුරුවයි.

පසුගිය වසරේ සැප්තැම්බර් මාසයට සාපේක්ෂව ඔස්ට්‍රේලියානුවන්ගේ මුළු ගෘහස්ථ වියදම් සියයට 6.8කින් ඉහළ ගොස් ඇති අතර, එම කාලසීමාවේ වාර්ෂික උද්ධමනය සියයට 4.3ක් ලෙස වාර්තා වී තිබෙනවා.

සැප්තැම්බර් මාසයේදී පමණක් ඉන්ධන සඳහා ජනතාව වැය කළ මුදල සියයට 5.4කින් ඉහළ ගොස් තිබෙනවා.

මැදපෙරදිග යුද ගැටුම් හේතුවෙන් ලෝක තෙල් මිල ඉහළ යාම සහ ඔස්ට්‍රේලියාවේ තාවකාලික ඉන්ධන බදු සහනය අවසන් වීම මේ සඳහා බලපා ඇති බවයි ABS ආයතනය පෙන්වා දෙන්නේ.

කෙසේ වෙතත්, ඉන්ධන සඳහා වැය කළ මුදල ඉහළ ගියද, ජනතාව මිලදී ගත් ඉන්ධන ප්‍රමාණය සියයට 2.2කින් පහත වැටී ඇති බව ද නවතම දත්ත අනාවරණය කරනවා.

මේ අතර, වෛද්‍යවරුන් හමුවීම, දන්ත වෛද්‍ය ප්‍රතිකාර, අක්ෂි පරීක්ෂණ සහ ඖෂධ මිලදී ගැනීම් සඳහා වැය කරන මුදල ද සැප්තැම්බර් මාසයේදී ඉහළ ගොස් තිබෙනවා.

ප්‍රමාද වී පැමිණි උණ රෝග ව්‍යාප්තිය හේතුවෙන් ඖෂධ සහ සෞඛ්‍ය ආශ්‍රිත නිෂ්පාදන සඳහා ජනතාව වැඩි මුදලක් වැය කර ඇති බව ද ABS වාර්තාව සඳහන් කරනවා.

ඒ අතරම AFL සහ NRL අවසන් මහා තරග ඇතුළු ප්‍රධාන ක්‍රීඩා ඉසව්, සජීවී සංගීත ප්‍රසංග සහ විනෝදාස්වාද වැඩසටහන් සඳහා ද ජනතාවගේ වියදම් ඉහළ ගොස් තිබෙනවා.

ඉදිරියේදී පැවැත්වීමට නියමිත ප්‍රසංග සහ විනෝදාස්වාද වැඩසටහන් සඳහා කල්තියා ප්‍රවේශපත් මිලදී ගැනීම ද මෙම වර්ධනයට බලපා තිබෙනවා.