ඔස්ට්‍රේලියාවේ NSW ප්‍රාන්ත සෞඛ්‍ය දෙපාර්තමේන්තුවට අයත් වෙබ් අඩවියකට එල්ල වූ සයිබර් ප්‍රහාරයක් සම්බන්ධයෙන් ප්‍රාන්ත පොලිසිය විශේෂ විමර්ශනයක් ආරම්භ කර තිබෙනවා.

පසුගිය ඔක්තෝබර් 29 වැනිදා හඳුනාගත් මෙම සිදුවීම, බරපතළ සයිබර් ආරක්ෂණ සිදුවීමක් ලෙස ප්‍රකාශයට පත්කර ඇති බවයි වාර්තා වන්නේ.

ප්‍රහාරයට ලක්ව ඇත්තේ රෝගීන්ට සහනාධාර සහිත දන්ත වෛද්‍ය ප්‍රතිකාර ලබාගැනීමට පහසුකම් සලසන Oral Health Fee For Service Scheme යන වෙබ් අඩවියයි.

එහිදී දන්ත වෛද්‍යවරුන් ඇතුළු බාහිර සෞඛ්‍ය සේවා සපයන්නන්ට අදාළ 4GBක පමණ දත්ත සොරාගෙන ඇති බවට සැක කරන අතර, රෝගීන්ගේ දත්තවලට හෝ සායනික සේවාවන්ට බලපෑමක් සිදුව නොමැති බව බලධාරීන් තහවුරු කර තිබෙනවා.

ප්‍රහාරය පිටුපස විදේශයන්හි සිටින පුද්ගලයන් සිටින බවට සැක කරන අතර, විමර්ශන සඳහා FBI ඇතුළු ජාත්‍යන්තර ආයතන සමග එක්ව විමර්ශන කටයුතු ආරම්භ කර ඇති බවයි වාර්තා වන්නේ.

මේ අතර, පොලිස් විමර්ශන හේතුවෙන් සිද්ධිය පිළිබඳ තොරතුරු ප්‍රසිද්ධ කිරීම ප්‍රමාද වූ බව ප්‍රාන්ත සෞඛ්‍ය අමාත්‍ය Ryan Park පවසනවා.

මෙම සිදුවීම සයිබර් ආරක්ෂාවේ වැදගත්කම යළි සිහිපත් කරවන අතර, සයිබර් තර්ජනවලට මුහුණදීම දිනෙන් දින වඩාත් අභියෝගාත්මක වෙමින් පවතින බවයි ප්‍රාන්ත ප්‍රවාහන අමාත්‍ය John Graham මාධ්‍යට අදහස් දක්වමින් පවසා ඇත්තේ.

සිද්ධිය සම්බන්ධයෙන් Strike Force Civic යටතේ වැඩිදුර පොලිස් විමර්ශන ක්‍රියාත්මක බවත් සදහන්.