ඔස්ට්‍රේලියාවේ Brisbane නගරයේ අවන්හලක සේවය කළ ඉතාලි ජාතික Chef කෙනෙකු, පීසා සඳහා අන්නාසි එක් කිරීම ප්‍රතික්ෂේප කිරීම ඇතුළු සේවා ස්ථානයේ ඇති වූ ගැටලු කිහිපයක් හේතුවෙන් රැකියාවෙන් ඉවත් කර තිබෙනවා.

Davide Tamburella නමැති මෙම Chef, Brisbaneහි La Costa අවන්හලේ සේවය කර ඇති අතර, පාරිභෝගිකයන් සඳහා Ham and Pineapple Pizza සකස් කරන ලෙස කළ ඉල්ලීම ඔහු ප්‍රතික්ෂේප කර ඇත්තේ එය තම ඉතාලි සංස්කෘතියට කරන අපහාසයක් බව පවසමින්.

පසුගිය වසර 4 තුළ අවස්ථා 3කදී ඔහු මෙලෙස අන්නාසි යෙදූ පීසා සකස් කිරීම ප්‍රතික්ෂේප කර ඇති බව Fair Work Commission විභාගයේදී අනාවරණය වී තිබෙනවා.

කෙසේ වෙතත්, අවන්හල් කළමනාකාරීත්වය සඳහන් කර ඇත්තේ අන්නාසි පිළිබඳ ගැටලුවට අමතරව සේවා ස්ථානයේ ඔහුගේ හැසිරීම, භාෂා භාවිතය සහ කළමනාකාරීත්වයේ උපදෙස් පිළිපැදීම සම්බන්ධයෙන් ද පැමිණිලි පැවති බවයි.

2026 මැයි 20 වැනිදා රැකියාවෙන් ඉවත් කළ මෙම Chef පසුව තම සේවය අසාධාරණ ලෙස අවසන් කළ බවට Fair Work Commission වෙත පැමිණිල්ලක් ඉදිරිපත් කර තිබුණා.

එහෙත් නියමිත කාලසීමාව ඉක්මවා පැමිණිල්ල ඉදිරිපත් කර තිබීම හේතුවෙන් එය ප්‍රතික්ෂේප කර ඇති අතර, සේවයෙන් ඉවත් කිරීම සාධාරණ ද යන්න පිළිබඳ අවසන් තීරණයක් කොමිසම ලබාදී නැහැ.

මෙම රැකියාව හරහා ඔස්ට්‍රේලියාවේ ස්ථිර පදිංචිය ලබාගැනීමට ද ඔහු අපේක්ෂාවෙන් සිට ඇති අතර, සේවය අහිමි වීමත් සමඟ ඔහුගේ Employer-Sponsored Visa ක්‍රියාවලියට ද බලපෑම් එල්ල වී තිබෙනවා.

මේ වන විට අදාළ La Costa අවන්හල වසා දමා ඇති අතර, සූපවේදියා Brisbane නගරයේ වෙනත් ඉතාලි අවන්හලක සේවය කරන බව වාර්තා වනවා.