වික්ටෝරියා ප්‍රාන්ත මැතිවරණයට තවත් සති කිහිපයක් ඉතිරිව තිබියදී, ස්වාධීන අපේක්ෂකයෙකුගේ මැතිවරණ ප්‍රචාරක පුවරුවක වෙඩි උණ්ඩ වැදුණු සලකුණු හමුවීම සම්බන්ධයෙන් පොලිසිය විමර්ශනයක් ආරම්භ කර තිබෙනවා.

වික්ටෝරියා ප්‍රාන්තයේ Benambra ආසනය සඳහා තරග කරන ස්වාධීන අපේක්ෂක වෛද්‍ය Lachlan McKeemanගේ ප්‍රචාරක පුවරුවක් Rutherglen ප්‍රදේශයේදී මෙලෙස හානි කර ඇති බවයි වාර්තා වන්නේ.

නොවැම්බර් 3 වැනිදා පස්වරු 6 සිට නොවැම්බර් 4 වැනිදා පෙරවරු 8 දක්වා කාලය තුළ මෙම සිදුවීම සිදුව ඇති බවට සැක කෙරෙන අතර, ප්‍රචාරක පුවරුවේ තිබූ අපේක්ෂකයාගේ රූපයට ද හානි කර තිබෙනවා.

සිද්ධිය සම්බන්ධයෙන් අදහස් දැක්වූ McKeeman ප්‍රකාශ කර ඇත්තේ දේශපාලන පක්ෂය කුමක් වුවත් ප්‍රචණ්ඩත්වය සහ බියගැන්වීම් කිසිසේත් අනුමත කළ නොහැකි බවයි.

මේ අතර, පසුගිය ඔක්තෝබර් මාසයේදී ස්වාධීන පාර්ලිමේන්තු මන්ත්‍රී Helen Haines මෝටර් රථ ප්‍රහාරයකට ලක් වීමෙන් ඇයගේ දෙපාම අහිමි වූ අතර, ඇය තවදුරටත් රෝහල්ගතව ප්‍රතිකාර ලබනවා.

එමෙන්ම Geelong ආසන්නයේ Torquay ප්‍රදේශයේදී One Nation පක්ෂයේ ස්වේච්ඡා සේවකයෙකුට පහරදීමේ සිද්ධියක් ද පසුගියදා වාර්තා වුණා.

නවතම වෙඩි තැබීමේ සිද්ධිය දේශපාලන අරමුණකින් සිදුකළ එකක්ද යන්න මෙතෙක් තහවුරු වී නොමැති අතර, නොවැම්බර් 28 වැනිදා පැවැත්වීමට නියමිත වික්ටෝරියා ප්‍රාන්ත මැතිවරණයට පෙර දේශපාලන ආරක්ෂාව පිළිබඳ අවධානය යළිත් ඉහළ ගොස් තිබෙනවා.