South Australia ප්‍රාන්තයේ ක්‍රියාත්මක වන Edge Early Learning ආයතනයට අයත් Childcare Centres 6ක් හෙට (නොවැම්බර් 6) සිට ස්ථිරවම වසා දැමීමට තීරණය කර තිබෙනවා.

මෙම මධ්‍යස්ථාන මිලදී ගැනීමට සුදුසු ආයෝජකයෙකු සොයාගැනීමට නොහැකි වීම හේතුවෙන් මෙම තීරණය ගෙන ඇති අතර, ඇතැම් දෙමාපියන්ට ඒ පිළිබඳ දැනුම් දී ඇත්තේ පැය 48කට ආසන්න කෙටි කාලයකට පෙරයි.

මෙලෙස වසා දැමීමට නියමිත මධ්‍යස්ථාන අතර Angle Vale ප්‍රදේශයේ මධ්‍යස්ථාන දෙකක් සහ Mount Barker, Seacombe Heights, Flagstaff Hill හා Port Augusta ප්‍රදේශවල මධ්‍යස්ථාන 4ක් ඇතුළත් වනවා.

Edge Early Learning ආයතනය පසුගිය අගෝස්තු මාසයේදී මූල්‍ය අර්බුදයක් හේතුවෙන් ස්වේච්ඡා පරිපාලනයට (Voluntary Administration) යොමු වූ අතර, එහි පරිපාලකයන් වන KordaMentha ආයතනය මධ්‍යස්ථාන රැසක් වෙනත් ආයතන වෙත විකිණීමට පියවර ගෙන තිබුණා.

Goodstart Early Learning ආයතනය මෙම මධ්‍යස්ථාන හය මිලදී ගැනීමට මුලින් සැලසුම් කළද, පසුව එම තීරණයෙන් ඉවත් වී ඇති අතර, වෙනත් ගැනුම්කරුවෙකු සොයාගැනීමට ගත් උත්සාහයන් ද අසාර්ථක වී තිබෙනවා.

මේ හේතුවෙන් දරුවන්ට වෙනත් Childcare Centres සොයාගැනීමට දෙමාපියන්ට සිදුව ඇති අතර, කෙටි දැනුම්දීමක් මත එවැනි විකල්ප සොයාගැනීම දැඩි අභියෝගයක් වී තිබෙනවා.

විශේෂයෙන් Port Augusta ප්‍රදේශයේ විකල්ප Childcare පහසුකම් සීමිත වීම හේතුවෙන් රැකියාවල නිරත දෙමාපියන් තවදුරටත් අසීරුතාවට පත්ව ඇති අතර, කලින් ගෙවා ඇති Childcare ගාස්තු ආපසු ලබාදීමට පරිපාලකයන් පොරොන්දු වී ඇති බවයි වාර්තා වන්නේ.

මේ අතර පසුගිය ඔක්තෝබර් මාසයේදී ද ඔස්ට්‍රේලියාව පුරා Edge Early Learning ආයතනයට අයත් Childcare Centres 11ක් වසා දැමුණු අතර, නවතම වසා දැමීම් හයත් සමඟ එම සංඛ්‍යාව 17ක් දක්වා ඉහළ යනවා.