Victoria ප්‍රාන්තයේ මාර්ගවල පවතින වලවල් හඳුනාගෙන ඒවා කඩිනමින් අලුත්වැඩියා කිරීම සඳහා කෘත්‍රිම බුද්ධි තාක්ෂණය යොදාගැනීමේ නව වැඩපිළිවෙළක් ආරම්භ කර තිබෙනවා.

ඒ අනුව Greater Geelong ප්‍රාදේශීය සභාව විසින් AI කැමරා සවිකළ මාර්ග පිරිසිදු කරන විශේෂ රථ දෙකක් මේ සඳහා යොදාගෙන තිබෙනවා.

එම රථ මාර්ගවල ගමන් කරන අතරතුර කැමරා මගින් මාර්ගයේ ඇති වලවල් ඡායාරූපගත කර ඒවායේ පිහිටීම, පළල සහ ගැඹුර ස්වයංක්‍රීයව හඳුනාගැනීම සිදුකරනවා.

එම තොරතුරු සභාවේ මාර්ග නඩත්තු කණ්ඩායම් වෙත යොමු කිරීමෙන් අලුත්වැඩියා කටයුතු වඩාත් කාර්යක්ෂමව සැලසුම් කිරීමට හැකියාව ලැබෙන බව සඳහන්.

2025 අගෝස්තු මාසයේ සිට අත්හදා බැලූ මෙම වැඩසටහන යටතේ මේ වනවිට වලවල් 1,600ක් පමණ හඳුනාගෙන තිබෙනවා.

මෙම තාක්ෂණය මගින් කුඩා අවධියේදීම මාර්ග හානි හඳුනාගැනීමට හැකිවීම නිසා විශාල හානි ඇතිවීමට පෙර ඒවා අලුත්වැඩියා කර මුදල් ඉතිරි කරගැනීමටත් අපේක්ෂා කරනවා.

ඉදිරියේදී නගර සභාවේ කසළ එකතු කරන රථ ඇතුළු අනෙකුත් වාහනවලටත් මෙම තාක්ෂණය ව්‍යාප්ත කිරීමට Greater Geelong සභාව සැලසුම් කර තිබෙනවා.