Queensland ප්‍රාන්තයේ ප්‍රදේශ රැසකට බලපා ඇති දැඩි උණුසුම් කාලගුණය පිළිබඳ අනතුරු ඇඟවීම් නිකුත් කර තිබෙනවා.

ගිම්හාන සමය නිල වශයෙන් ආරම්භ වීමටත් පෙර ඇතිව තිබෙන මෙම උණුසුම් කාලගුණ තත්ත්වය හේතුවෙන් Queensland ප්‍රාන්තයේ අභ්‍යන්තර ප්‍රදේශ කිහිපයක උෂ්ණත්වය සෙල්සියස් අංශක 40ත් ඉක්මවා යා හැකි බවයි කාලගුණ විද්‍යා කාර්යාංශය පවසන්නේ.

අද Brisbane නගරයේ උෂ්ණත්වය සෙල්සියස් අංශක 36ක් දක්වා ඉහළ ගොස් ඇති අතර, Gold Coast සහ Sunshine Coast ප්‍රදේශවල ද දැඩි උණුසුමක් වාර්තා වී තිබෙනවා.

විශේෂයෙන් Peninsula, Gulf Country, Northern Goldfields, Upper Flinders සහ උතුරු වෙරළබඩ ප්‍රදේශ රැසකට දැඩි උණුසුම් කාලගුණ අනතුරු ඇඟවීම් නිකුත් කර ඇති අතර, මෙම තත්ත්වය සති අන්තය දක්වා තවදුරටත් පැවතිය හැකි බව සඳහන්.

කෙසේ වෙතත් Brisbane ඇතුළු දකුණු Queensland ප්‍රදේශවල උෂ්ණත්වය හෙට දිනයේ සෙල්සියස් අංශක 28ක් දක්වා පහත වැටෙනු ඇතැයි අපේක්ෂා කරන අතර, උතුරු ප්‍රදේශවල දැඩි උණුසුම තවදුරටත් පවතිනු ඇති බවට අනාවැකි පළ කර තිබෙනවා.

මෙවැනි උණුසුම් කාලගුණ තත්ත්වයන් වැඩිහිටියන්ට, කුඩා දරුවන්ට, ගර්භණී කාන්තාවන්ට සහ විවිධ රෝගාබාධවලින් පෙළෙන පුද්ගලයන්ට විශේෂයෙන් අවදානම් සහගත විය හැකි බවටයි කාලගුණ විද්‍යා කාර්යාංශය අනතුරු අඟවන්නේ.

ඒ අනුව ප්‍රමාණවත් ලෙස ජලය පානය කිරීම, දැඩි හිරු රශ්මියට නිරාවරණය වීමෙන් වැළකීම සහ හැකි සෑම විටම සිසිල් ස්ථානවල රැඳී සිටීම ඇතුළු ආරක්ෂිත ක්‍රියාමාර්ග අනුගමනය කරන ලෙස ජනතාවට දැනුම් දී තිබෙනවා.