ඔස්ට්‍රේලියානු Visa ලබාගැනීම සඳහා ව්‍යාජ ලේඛන හෝ අසත්‍ය තොරතුරු ඉදිරිපත් කරන පුද්ගලයන්ට එරෙහිව වසර 10ක් දක්වා සිරදඬුවම් ඇතුළු දැඩි නීතිමය ක්‍රියාමාර්ග ගත හැකි බව ඔස්ට්‍රේලියානු ආගමන බලධාරීන් අවධාරණය කරනවා.

ඒ අනුව, Visa අයදුම්පත් සමඟ ඉදිරිපත් කරන සියලුම ලේඛන සත්‍ය, නිවැරදි සහ තහවුරු කළ හැකි ඒවා විය යුතු බව Department of Home Affairs දැනුම් දෙනවා.

ව්‍යාජ බැංකු ගිණුම් වාර්තා, රැකියා සහතික, අධ්‍යාපන සහතික මෙන්ම වෙනස් කරන ලද ඡායාරූප සහ වෙනත් ලේඛන ඉදිරිපත් කිරීමද නීතිවිරෝධී ක්‍රියාවක් ලෙස සැලකෙනවා.

එවැනි අසත්‍ය තොරතුරු හෝ ලේඛන ඉදිරිපත් කිරීම හේතුවෙන් Visa අයදුම්පත් ප්‍රතික්ෂේප වීමට, දැනටමත් ලබාගෙන ඇති Visa අවලංගු වීමට මෙන්ම අනාගත Visa අයදුම්පත් සඳහා සීමා පැනවීමටත් ඉඩ තිබෙනවා.

විශේෂයෙන්ම Migration Act 1958 හි 234 වැනි වගන්තිය යටතේ ව්‍යාජ හෝ ව්‍යාජ ලෙස සකස් කළ ලේඛන ඉදිරිපත් කිරීම අපරාධ වරදක් වන අතර, ඒ සඳහා වසර 10ක් දක්වා සිරදඬුවමක් හෝ Australian Dollar 1,000ක Penalty Units ප්‍රමාණයකට අදාළ දඩයක් හෝ එම දඬුවම් දෙකම පැනවිය හැකියි.

එමෙන්ම, Commonwealth ආයතනයකට අසත්‍ය හෝ නොමඟ යවන තොරතුරු ලබාදීම සම්බන්ධයෙන් Criminal Code යටතේ වසරක උපරිම සිරදඬුවමක්ද නියම කළ හැකි බව සඳහන්.

Migration Agent කෙනෙකුගේ සහාය ලබාගෙන Visa අයදුම් කළද, එහි සඳහන් තොරතුරු සහ ඉදිරිපත් කරන ලේඛන නිවැරදි බව තහවුරු කරගැනීම අයදුම්කරුගේම වගකීමක් බවයි බලධාරීන් පෙන්වා දෙන්නේ.

ඒ අනුව, ඔස්ට්‍රේලියාවට පැමිණීමට අපේක්ෂා කරන සියලු දෙනා තම Visa අයදුම්පත් ඉදිරිපත් කිරීමේදී සත්‍ය තොරතුරු සහ නිල ලේඛන පමණක් භාවිත කරන ලෙසට දැනුම් දී තිබෙනවා.