ඔස්ට්‍රේලියාවේ ප්‍රසිද්ධ David Jones වෙළෙඳසැල් ජාලයේ පවතින මූල්‍ය අර්බුදය හමුවේ, එහි පාරිභෝගිකයන්ට තමන් සතු Gift Cards සහ කලින් මුදල් ගෙවා ඇණවුම් කළ භාණ්ඩ සම්බන්ධයෙන් කඩිනමින් අවධානය යොමුකරන ලෙස පාරිභෝගික අයිතිවාසිකම් පිළිබඳ විශේෂඥයන් උපදෙස් ලබාදී තිබෙනවා.

දැනට පවතින Gift Cards හැකි ඉක්මනින් භාවිත කරන ලෙසත්, අලුතින් Gift Cards මිලදී ගැනීමෙන් තාවකාලික ව වළකින ලෙසත් ජනතාවට උපදෙස් ලබාදෙන බවයි Consumer Policy Research Centre ආයතනයේ ප්‍රධාන විධායක නිලධාරිනී Erin Turner පවසන්නේ.

සමාගම ස්වේච්ඡා පරිපාලනයකට යොමු වී, පසුව ඈවර කිරීමකට ලක්වුවහොත්, Gift Cards හි ඉතිරි මුදල් සම්පූර්ණයෙන්ම හෝ කොටසක් අහිමි වීමේ අවදානමක් පවතින බව විශේෂඥයන් අනතුරු අඟවනවා.

එමෙන්ම Lay-by ක්‍රමයට අත්තිකාරම් ගෙවා වෙන්කරගත් භාණ්ඩ සම්බන්ධයෙන් ඉතිරි ගෙවීම් සිදුකර භාණ්ඩ ලබාගැනීම හෝ මුදල් ආපසු ලබාගැනීම පිළිබඳ වෙළෙඳසැල සමඟ කඩිනමින් සාකච්ඡා කරන ලෙසත් උපදෙස් ලබාදී තිබෙනවා.

අන්තර්ජාලය ඔස්සේ මිලදී ගත් භාණ්ඩ නොලැබුණහොත්, බැංකුව හරහා ගෙවීම ආපසු ලබාගැනීමේ ක්‍රියාවලියක් වන Chargeback පිළිබඳ විමසිය හැකි අතර, ආපසු ලබාදීමට හෝ මාරු කිරීමට අවශ්‍ය භාණ්ඩ තිබේ නම් ඒ සඳහා ද ප්‍රමාද නොවී පියවර ගන්නා ලෙසයි ජනතාවට දැනුම්දෙන්නේ.