කැන්බරා ඇතුළු ප්රධාන නගර අයත් ඔස්ට්රේලියානු අගනුවර කලාපයේ (ACT) ජ්යෙෂ්ඨ ද්විතීයික පාසල් පද්ධතිය තුළ දැවැන්ත අධ්යාපන ප්රතිසංස්කරණයක් සිදු කිරීමට යෝජනා වී තිබෙනවා.
ඒ අනුව ඉදිරියේදී 11 සහ 12 ශ්රේණිවල සිසුන් සඳහා ගණිතය විෂය හැදෑරීම අනිවාර්ය කිරීමට ගණිත උපදේශක කමිටුව (Mathematics Advisory Committee) නිර්දේශ කර ඇති බවයි වාර්තා වන්නේ.
දැනට පවතින දත්තවලට අනුව ACT කලාපයේ සිසුන්ගෙන් 43%ක් පමණ ගණිතමය සාක්ෂරතාවය සහ තර්ක හැකියාව අතින් ජාතික මට්ටමට වඩා පසුපසින් සිටින බව හෙළි වී තිබෙනවා.
එමෙන්ම ජාතික මට්ටමින් සිසුන් 27% ත් 35ත් අතර ප්රමාණයකට ගැටළු විසඳීමේ හැකියාව, ඩිජිටල් සාක්ෂරතාවය සහ මූල්ය කළමනාකරණය පිළිබඳ නිසි ප්රවීණතාවයක් නොමැති බව ද නවතම වාර්තා පෙන්වා දෙනවා.
මේ අතර උසස් අධ්යාපනයේදී ගණිතය සහ විද්යාව වැනි විෂයයන් තෝරා ගැනීමට ශිෂ්යාවන් නොපෙළඹීම හේතුවෙන් ශ්රම බලකාය තුළ ඉහළ වැටුප් සහිත තාක්ෂණික රැකියා අවස්ථා කාන්තාවන්ට අහිමි වී යන බවයි මෙම කමිටු වාර්තාව පෙන්වා දෙන්නේ.
කෙසේ වෙතත්, ගණිතය පිළිබඳව සිසුන් තුළ පවතින බිය සහ මානසික ආතතිය (Maths Anxiety) මෙම විෂය මඟ හැරීමට ප්රධාන හේතුවක් වී ඇති බැවින්, මනෝවිද්යාත්මක උපදේශන ක්රමවේද ඔස්සේ සිසුන්ගේ එම බිය දුරු කිරීමට ද මෙහිදී පියවර ගත යුතු බව විද්වතුන් අවධාරණය කරනවා.
මෙම නව වාර්තාව මේ වන විට මහජන අදහස් විමසීම සඳහා විවෘත කර ඇති අතර, ඉදිරි මාස කිහිපය තුළ ශිෂ්යයින්, දෙමාපියන් සහ ගුරුවරුන් සමඟ සාකච්ඡා කර අවසන් තීරණයක් ගැනීමට නියමිතයි.
