ඕස්ට්රේලියාවේ ජනගහනය මේ වනවිට මිලියන 28 සීමාව ඉක්මවා ඇති බව නවතම ජනගහන ඇස්තමේන්තු පෙන්වා දෙනවා.
2024 අවසානයේදී රටේ ජනගහනය මිලියන 27.4ක් ලෙස වාර්තා වූ අතර, ඉන් පසු කාලය තුළ එය තවදුරටත් වේගයෙන් ඉහළ ගොස් තිබෙනවා.
ඕස්ට්රේලියානු සංඛ්යාලේඛන කාර්යාංශය (ABS) නිකුත් කළ දත්ත අනුව, 2024 වසරේ පමණක් ජනගහනය 445,900කින් ඉහළ ගොස් තිබුණා.
එම වර්ධනයෙන් 340,800කට වැඩි පිරිසක් එක්වී ඇත්තේ විදේශ සංක්රමණය හරහායි.
2025 වසර තුළද එම ප්රවණතාවය අඛණ්ඩව පැවති අතර, සැප්තැම්බර් දක්වා වූ මාස 12ක කාලය තුළ ජනගහනය තවත් 423,600කින් ඉහළ ගොස් තිබෙනවා.
එහිදීද ජනගහන වර්ධනයේ විශාලතම කොටස ශුද්ධ විදේශ සංක්රමණය මගින් සිදුව ඇති බව දත්ත පෙන්වා දෙනවා.
මේ අනුව 2024 ආරම්භයේ සිට 2026 මැද භාගය දක්වා කාලය තුළ ඕස්ට්රේලියාවේ ජනගහනය ලක්ෂ 9කට ආසන්න සංඛ්යාවකින් වැඩි වී ඇති බවට ඇස්තමේන්තු කරනු ලබනවා.
නිවාස, ප්රවාහන, සෞඛ්ය සහ අධ්යාපන සේවා සඳහා ඉල්ලුම ඉහළ යාමට මෙම ජනගහන වර්ධනය බලපා ඇති බව විශ්ලේෂකයින් පෙන්වා දෙනවා.
විශේෂයෙන්ම දක්ෂ ශ්රමිකයින්, ජාත්යන්තර සිසුන් සහ ස්ථිර පදිංචිය සඳහා පැමිණෙන සංක්රමණිකයින් මෙම වර්ධනයට සැලකිය යුතු දායකත්වයක් ලබා දී තිබෙනවා.
ජනගහනයේ වේගවත් වර්ධනය හේතුවෙන් නිවාස මිල, කුලී ගාස්තු සහ යටිතල පහසුකම් පිළිබඳ විවාදය ද ඕස්ට්රේලියාව තුළ තවදුරටත් උණුසුම් වී තිබෙනවා.
