ලෝක වෙළඳපොළේ කොකෝවා මිල පහත වැටී තිබුණ ද, ඔස්ට්රේලියාවේ පාස්කු චොක්ලට් මිල වාර්තාගත ලෙස ඉහළ ගොස් තිබෙනවා.
මේ හේතුවෙන් පාරිභෝගිකයින් දැඩි අපහසුතාවයට පත්ව ඇති බවයි වාර්තා වන්නේ.
සෑම වසරකම පාස්කු උත්සවයේ ප්රධාන අංගයක් වන Chocolate Bunnies සහ Chocolate Eggs මෙවර සුඛෝපභෝගී භාණ්ඩයක් බවට පත්ව තිබෙනවා.
2024 වසරේදී ඩොලර් 14කට පමණ අලෙවි වූ 200gක Lindt Gold Bunny එකක මිල මේ වන විට ඩොලර් 20 දක්වා 43%කින් ඉහළ ගොස් ඇතැයි සඳහන්.
සිල්ලර වෙළඳුන් පවසන්නේ පසුගිය කාලසීමාවේ කොකෝවා අස්වැන්න අඩුවීම සහ නිෂ්පාදන පිරිවැය ඉහළ යාම මීට හේතු වූ බවයි.
මේ අතර ලෝක වෙළඳපොළේ කොකෝවා මිල මේ වන විට යම් ප්රමාණයකට අඩු වී ඇතත්, එම වාසිය පාරිභෝගිකයාට ලැබීමට තවත් කාලයක් ගතවනු ඇතැයි විද්වතුන් පවසනවා.
ඒ, දැනට වෙළඳපොළේ ඇති චොක්ලට් නිෂ්පාදනය කර ඇත්තේ අධික මිලට කොකෝවා මිලදී ගත් කාලසීමාවේදී වීම හේතුවෙන්.
මේ අතර, සුපිරි වෙළඳසැල් ජාලයන්හි මිල නියම කිරීමේ ක්රමවේදයන් පිළිබඳව ද ඔස්ට්රේලියානු තරඟකාරී සහ පාරිභෝගික කොමිසම (ACCC) දැඩි අවධානයෙන් පසුවනවා.
චොක්ලට් නිෂ්පාදකයින් පවසන්නේ තත්ත්වයෙන් උසස් නිෂ්පාදන ලබාදීම සඳහා මිල ඉහළ දැමීම හැර වෙනත් විකල්පයක් නොමැති බවයි.
කෙසේ වෙතත්, 2027 වසර වන විට චොක්ලට් මිල යම් මට්ටමකට අඩු වනු ඇති බවයි අපේක්ෂා කෙරෙන්නේ.
