2018 වසරේදී ඔස්ට්‍රේලියානු ක්‍රිකට් ක්‍රීඩාව දැඩි ආන්දෝලනයකට ලක්කළ පන්දුව පළුදු කිරීමේ සිද්ධිය සම්බන්ධයෙන් හිටපු ක්‍රිකට් ක්‍රීඩක David Warner වසර 8කට පසු සිය නිහඬතාව බිඳ තිබෙනවා.

හිටපු ඔස්ට්‍රේලියානු ක්‍රීඩක Usman Khawaja සිය නවතම ග්‍රන්ථයෙන් සිදුකළ හෙළිදරව් සියයට සියයක් නිවැරදි බවයි Warner සඳහන් කරන්නේ.

2018 වසරේ දකුණු අප්‍රිකාවේ කේප්ටවුන්හි පැවති ටෙස්ට් තරගයකදී වැලි කඩදාසි භාවිතයෙන් ක්‍රිකට් පන්දුවේ ස්වභාවය වෙනස් කිරීමේ සිද්ධිය සම්බන්ධයෙන් එවකට නායක Steve Smith සහ උපනායක David Warnerට වසරක තරග තහනමක් පනවා තිබුණා.

Cameron Bancroftට ද මාස නවයක තරග තහනමක් පැනවුණා.

කෙසේ වෙතත් Usman Khawaja සිය නවතම ග්‍රන්ථය වන Sabr හරහා චෝදනා කරන්නේ, පන්දුව පළුදු කිරීමේ සැලසුම පිළිබඳව ඔස්ට්‍රේලියානු කණ්ඩායමේ අනෙකුත් සාමාජිකයන් සහ පුහුණු කාර්ය මණ්ඩලය ද දැන සිටි බවයි.

මෙම ප්‍රකාශයට සම්පූර්ණ සහය පළකරමින් David Warner සඳහන් කරන්නේ, එවකට Cricket Australia ආයතනය සිදුකළ විමර්ශනය කඩිමුඩියේ සහ නිසි ක්‍රමවේදයකින් තොරව සිදුකර ඇති බවයි.

සිද්ධිය සිදුවූ අවස්ථාවේ Cameron Bancroft අසල සිටි Usman Khawajaගෙන් පවා විමර්ශන නිලධාරීන් නොවිමසීම පිළිබඳව වෝනර් ප්‍රශ්න කර තිබෙනවා.

එවැනි විමර්ශනයක් සම්පූර්ණ සහ සාධාරණ පරීක්ෂණයක් ලෙස පිළිගන්නේ කෙසේදැයි ඔහු විමසා සිටිනවා.

තමන්ගේ අරමුණ කිසිවෙකුට චෝදනා කිරීම නොව සිද්ධිය සම්බන්ධයෙන් සත්‍යය, වගවීම සහ විනිවිදභාවය තහවුරු කිරීම බවයි වෝනර් වැඩිදුරටත් සඳහන් කරන්නේ.

මේ අතර වසර අටකට පසු මෙම සිද්ධිය යළි සාකච්ඡාවට ලක්වීම තම පවුලට ද දැඩි මානසික බලපෑමක් ඇතිකර ඇති ද බව ඔහු පවසනවා.

කෙසේ වෙතත් Cricket Australia ආයතනය සිය මුල් විමර්ශනයේ නිගමන තවදුරටත් ආරක්ෂා කරමින් සිටින අතර, කවාජාගේ චෝදනා ස්වාධීනව තහවුරු වී නැහැ.

මෙම නව හෙළිදරව් සමඟ 2018 පන්දුව පළුදු කිරීමේ සිද්ධිය සම්බන්ධයෙන් ඔස්ට්‍රේලියානු ක්‍රිකට් ක්ෂේත්‍රය තුළ යළිත් දැඩි අවධානයක් යොමුව තිබෙනවා.