ඔස්ට්‍රේලියානුවන්ට අවශ්‍ය අවස්ථාවේදී දැරිය හැකි මිලකට සෞඛ්‍ය සේවා ලබාගැනීම පහසු කිරීමේ අරමුණින් ඔස්ට්‍රේලියානු ෆෙඩරල් රජය නව දැනුවත් කිරීමේ වැඩසටහනක් ආරම්භ කර තිබෙනවා.

Medicare Services නමින් ආරම්භ කර ඇති මෙම වැඩසටහන මඟින් දැනට පවතින 1800MEDICARE සේවාව, පුළුල් කළ Bulk Billing පහසුකම් සහ Medicare Urgent Care Clinics පිළිබඳ ජනතාව දැනුවත් කිරීමට නියමිතයි.

ඒ අනුව, හදිසි නොවන සෞඛ්‍ය ගැටලු සඳහා ලියාපදිංචි හෙද නිලධාරියෙකුගෙන් නොමිලේ උපදෙස් ලබාගැනීමට 1800MEDICARE සේවාව ඔස්සේ දවසේ පැය 24 පුරා අවස්ථාව හිමිවනවා.

මෙම සේවාව ලබාගැනීමට Medicare කාඩ්පතක් අවශ්‍ය නොවන අතර, ඔස්ට්‍රේලියාවේ සිටින ඕනෑම අයෙකුට 1800 633 422 යන අංකය ඇමතීමෙන් හෝ 1800MEDICARE නිල වෙබ් අඩවිය ඔස්සේ සෞඛ්‍ය උපදෙස් ලබාගත හැකි වෙනවා. එමෙන්ම, මීට පෙර my health app ලෙස හැඳින්වූ 1800MEDICARE app නම් ජංගම යෙදුම (App) හරහා ද සෞඛ්‍ය තොරතුරු සහ අනෙක් පහසුකම් ලබාගැනීමට අවස්ථාව පවතිනවා.

මේ අතර, Bulk Billing පහසුකම් පුළුල් කිරීමත් සමඟ Medicare සඳහා සුදුසුකම් ඇති රෝගීන්ට තමන්ගේ මුදලින් ගෙවීමට සිදුවන වෛද්‍ය වියදම් අඩුකරගැනීමට වැඩි අවස්ථාවක් හිමිව තිබෙනවා.

රජයේ දත්ත අනුව, ඔස්ට්‍රේලියානුවන්ගෙන් 97%ක් පමණ Bulk Billing පහසුකම් සපයන වෛද්‍ය මධ්‍යස්ථානයකට මිනිත්තු 20ක රිය ගමනකින් ළඟා විය හැකි ප්‍රදේශවල ජීවත් වන බවයි වාර්තා වන්නේ. ඒ අනුව, Medicare සඳහා සුදුසුකම් ඇති ජනතාවට තමන්ගේ මුදලින් ගෙවීමට සිදුවන වෛද්‍ය වියදම් අවම කරගනිමින් සෞඛ්‍ය සේවා ලබාගැනීමට වැඩි අවස්ථාවක් පවතිනවා.

එමෙන්ම, ජීවිතයට තර්ජනයක් නොවන නමුත් කඩිනම් ප්‍රතිකාර අවශ්‍ය රෝග සහ තුවාල සඳහා ප්‍රතිකාර සපයන Medicare Urgent Care Clinics 137ක් මේ වනවිට රට පුරා ක්‍රියාත්මක වන බවයි සඳහන් වන්නේ. මෙම මධ්‍යස්ථාන සතියේ දින හතේම දීර්ඝ වේලාවක් විවෘතව පවතින අතර, කලින් වේලාවක් වෙන්කරගැනීම හෝ වෙනත් වෛද්‍යවරයෙකුගේ පෙර නිර්දේශයක් අවශ්‍ය වන්නේ නැහැ.

නව දැනුවත් කිරීමේ වැඩසටහන රූපවාහිනී, සමාජ මාධ්‍ය සහ අනෙකුත් ප්‍රචාරණ මාධ්‍ය ඔස්සේ රට පුරා ක්‍රියාත්මක කිරීමට නියමිත බවයි රජය දැනුම්දෙන්නේ.