වික්ටෝරියා ප්‍රාන්තයේ පොලිස් ස්ථාන රැසක මහජන සේවා සීමා කිරීම සම්බන්ධයෙන් එල්ල වූ විරෝධතා හමුවේ, පොලිස් සේවා පුළුල් කිරීම සඳහා ඔස්ට්‍රේලියානු ඩොලර් මිලියන 370ක නව මැතිවරණ පොරොන්දුවක් Labor පක්ෂය ප්‍රකාශයට පත්කර තිබෙනවා.

නොවැම්බර් 28 වැනිදා පැවැත්වෙන ප්‍රාන්ත මැතිවරණයෙන් යළි බලයට පත්වුවහොත් මෙම වැඩපිළිවෙළ ක්‍රියාත්මක කරන බවයි වික්ටෝරියා ප්‍රාන්ත අග්‍රාමාත්‍ය Ben Carroll සඳහන් කරන්නේ.

ඒ අනුව ඩොලර් මිලියන 70ක් වැය කරමින්, පොලිස් ස්ථානවල මහජන සේවා කවුළු සඳහා අතිරේක පොලිස් නිලධාරීන් 200 දෙනෙකු බඳවා ගැනීමට සැලසුම් කර ඇති අතර, එමඟින් දැනට සීමා කර ඇති සේවා කාලය දීර්ඝ කිරීමට සහ ඇතැම් පොලිස් ස්ථාන නැවත මහජනතාවට විවෘත කිරීමට අපේක්ෂා කරනවා.

ඉතිරි ඩොලර් මිලියන 300 යටතේ Watergardens සහ Doncaster ප්‍රදේශවල නව පොලිස් ස්ථාන ඉදිකිරීමටත්, Keilor Downs සහ Greensborough පොලිස් ස්ථාන නැවත ඉදිකිරීමටත්, Moonee Ponds සහ Clayton පොලිස් ස්ථාන නවීකරණය කිරීමටත් යෝජනා කර තිබෙනවා.

වික්ටෝරියාවේ පොලිස් ස්ථාන 40කට වැඩි සංඛ්‍යාවක මහජන සේවා කවුළු වසා දැමීම හෝ විවෘතව පවතින කාලය සීමා කිරීම හේතුවෙන් ජනතාවට පොලිස් සේවා ලබාගැනීමේ දුෂ්කරතා මතුව ඇති පසුබිමක මෙම නිවේදනය නිකුත් කර ඇති බවයි වාර්තා වන්නේ.

කෙසේ වෙතත්, නව වැඩපිළිවෙළ යටතේ නැවත විවෘත කෙරෙන පොලිස් ස්ථාන මොනවාද යන්න Labor පක්ෂය මෙතෙක් නිශ්චිතව ප්‍රකාශ කර නොමැති අතර, අතිරේක සංචිත නිලධාරීන් සේවයේ යෙදවිය යුතු ස්ථාන තීරණය කිරීම Victoria Police ආයතනයට පැවරීමට නියමිතයි.

මීට අමතරව, නව පොලිස් නිලධාරීන් 1,500ක් බඳවා ගැනීම සහ Melbourne බටහිර ප්‍රදේශයේ නව පොලිස් පුහුණු ඇකඩමියක් ස්ථාපිත කිරීම ද Labor පක්ෂයේ මැතිවරණ සැලසුම් අතරට ඇතුළත් වනවා.

මේ අතර විපක්ෂ නායිකා Jess Wilson ප්‍රමුඛ Coalition සන්ධානය ද අතිරේක පොලිස් නිලධාරීන් 3,000ක් බඳවා ගැනීමට සහ මහජන සේවා සීමා කර ඇති පොලිස් ස්ථාන 40කට වැඩි සංඛ්‍යාවක් නැවත විවෘත කිරීමට පොරොන්දු වී තිබෙනවා.

ඒ අනුව, ප්‍රාන්තයේ මහජන ආරක්ෂාව සහ පොලිස් සේවා සඳහා ප්‍රවේශය නොවැම්බර් 28 මැතිවරණයේ ප්‍රධාන අවධානයට ලක්වන කරුණු අතරට එක්ව තිබෙනවා.