නොවැම්බර් 28 වැනිදා පැවැත්වීමට නියමිත වික්ටෝරියා ප්‍රාන්ත මැතිවරණයට පෙර නිකුත් වූ නවතම ජනමත සමීක්ෂණයකින් පාලක Labor පක්ෂයට ලැබෙන සහයෝගය සියයට 22ක් දක්වා පහත වැටී ඇති බව අනාවරණය වී තිබෙනවා.

Lighthouse Tracking Poll ජනමත සමීක්ෂණයට අනුව, Liberal–National Coalition පක්ෂ සන්ධානය සියයට 31ක සහයෝගයක් ලබා පළමු ස්ථානයේ පසුවන අතර, One Nation පක්ෂය සියයට 23ක් ලබා දෙවැනි ස්ථානයට පැමිණ තිබෙනවා.

මෙම ප්‍රතිඵල අනුව, අගමැති Ben Carrollගේ නායකත්වයෙන් යුත් Labor පක්ෂය ප්‍රධාන පක්ෂ තුන අතර තුන්වැනි ස්ථානයට පත්ව තිබීම විශේෂත්වයක්.

එමෙන්ම Labor රජය නැවත බලයට පත්වීමට සුදුසු බව විශ්වාස කරන්නේ සමීක්ෂණයට සහභාගී වූවන්ගෙන් සියයට 23ක් පමණක් බව ද වාර්තා වනවා.

පක්ෂ නායකයන් පිළිබඳ ජනතා ප්‍රසාදය සලකා බැලීමේදී Liberal නායිකා Jess Wilsonගේ ශුද්ධ ප්‍රසාද අගය +9ක් ලෙසත්, ප්‍රාන්ත අගමැති Ben Carrollගේ අගය -21ක් ලෙසත් සටහන් වී තිබෙනවා.

මේ අතර, මෙල්බන් නගරයේ Dandenong, Kalkallo, Werribee සහ Point Cook වැනි සාම්ප්‍රදායික Labor බලප්‍රදේශවල මැතිවරණ ප්‍රචාරණ කටයුතු සඳහා පක්ෂය සැලකිය යුතු මුදලක් වැය කරමින් සිටින බව ද අනාවරණය වී තිබෙනවා.

Monash විශ්වවිද්‍යාලයේ දේශපාලන විශ්ලේෂක Zareh Ghazarian පෙන්වා දෙන්නේ මෙම ප්‍රතිඵල Labor පක්ෂයට මැතිවරණ ව්‍යාපාරයේදී මුහුණදීමට ඇති අභියෝග පෙන්නුම් කරන බවයි.

ඔක්තෝබර් 19 සිට නොවැම්බර් 1 දක්වා ඡන්දදායකයන් 1,289 දෙනෙකු සම්බන්ධ කරගෙන මෙම සමීක්ෂණය සිදුකර ඇති අතර, එහි වාර්තාගත දෝෂ සීමාව සියයට 3.3ක්.

කෙසේ වෙතත්, මෙම සංඛ්‍යා එක් ජනමත සමීක්ෂණයක ප්‍රතිඵල පමණක් වන අතර, නොවැම්බර් 28 මැතිවරණයේ අවසන් ප්‍රතිඵලය ලෙස සැලකිය නොහැකියි.