ඔස්ට්‍රේලියාව සහ යුරෝපා සංගමය අතර ඇති කරගැනීමට සැලසුම් කර ඇති නිදහස් වෙළෙඳ ගිවිසුම (Australia–EU Free Trade Agreement) මඟින් රටේ ආර්ථික වර්ධනය ඉහළ නැංවීමට, නව රැකියා අවස්ථා බිහිකිරීමට සහ පාරිභෝගිකයන්ගේ ජීවන වියදම අඩු කිරීමට හැකිවනු ඇතැයි අගමැති Anthony Albanese ප්‍රකාශ කර තිබෙනවා.

නිදහස් හා සාධාරණ ජාත්‍යන්තර වෙළෙඳාම ඔස්ට්‍රේලියාවේ ආර්ථිකයට ඉතා වැදගත් බවත්, එමඟින් රැකියා අවස්ථා වැඩිවන බවත් අගමැතිවරයා අවධාරණය කළා.

මෙම ගිවිසුම හරහා මිලියන 450ක පාරිභෝගිකයන් සිටින යුරෝපා වෙළෙඳපොළ වෙත ඔස්ට්‍රේලියානු භාණ්ඩ හා සේවා අපනයනය කිරීමට වැඩි අවස්ථා ලැබෙනු ඇති බවයි ඔහු පෙන්වා දෙන්නේ.

ගිවිසුම ක්‍රියාත්මක වීමෙන් පසු ඔස්ට්‍රේලියාවේ සිට යුරෝපා සංගමයට අපනයනය කරන භාණ්ඩවලින් සියයට 97.8ක් පමණ තීරුබදු රහිතව එම වෙළෙඳපොළට ඇතුළත් කිරීමට හැකිවනු ඇති බව රජය සඳහන් කරනවා.

එමෙන්ම යුරෝපයෙන් ඔස්ට්‍රේලියාවට ආනයනය කරන භාණ්ඩ සඳහා පවතින වෙළෙඳ බාධක සහ තීරුබදු අඩුවීමෙන් පාරිභෝගිකයන්ට අඩු මිලට භාණ්ඩ ලබාගැනීමට අවස්ථාව සැලසිය හැකි බව ද අගමැතිවරයා ප්‍රකාශ කළා.

මෙවැනි වෙළෙඳ ගිවිසුම් මඟින් උද්ධමනය අඩු කිරීමට සහ ඔස්ට්‍රේලියානු පවුල්වල ජීවන වියදම් පීඩනය ලිහිල් කිරීමට සහාය ලැබෙනු ඇතැයි රජය අපේක්ෂා කරනවා.

කෙසේ වෙතත්, Australia–EU Free Trade Agreement සාකච්ඡා 2026 මාර්තු 24 වැනිදා අවසන් වී තිබුණද, එය මෙතෙක් බලාත්මක වී නැහැ.

ඒ සඳහා අවශ්‍ය නීතිමය සහ පාර්ලිමේන්තු ක්‍රියාවලිය තවදුරටත් සම්පූර්ණ කළ යුතුව තිබෙනවා.