Australian Taxation Office (ATO) විසින් ඔස්ට්‍රේලියාවේ බදු ගෙවන්නන් 8,000කට ආසන්න පිරිසකට සිය බදු වාර්තාවල සඳහන් වියදම් නැවත පරීක්ෂා කරන ලෙස දැනුම් දෙමින් විශේෂ ලිපි රැසක් යොමු කර තිබෙනවා.

රැකියාවට අදාළ වියදම් සඳහා බදු සහන ඉල්ලා ඇති පුද්ගලයන්ගේ බදු වාර්තා පරීක්ෂා කිරීමේදී, සමාන ආදායම් ලබන සහ සමාන රැකියා තත්ත්වයන් ඇති අනෙකුත් පුද්ගලයන්ට වඩා ඇතැමුන් ඉතා ඉහළ වියදම් ප්‍රමාණයක් සඳහන් කර ඇති බව ATO ආයතනය හඳුනාගෙන තිබෙනවා. ඒ අනුව, එම වියදම් නිවැරදිදැයි නැවත පරීක්ෂා කරන ලෙස දැනුම් දෙමින් අදාළ පුද්ගලයන්ට මෙම ලිපි යොමුකර ඇති බවයි වාර්තා වන්නේ.

බදු වාර්තා ඉදිරිපත් කිරීම සඳහා නියමිත ව තිබූ අවසන් දිනයට එනම් ඔක්තෝම්බර් 31 වෙනිදා ට පෙර සිටම ATO විසින් මෙම ලිපි යැවීම ආරම්භ කර තිබෙනවා.

බදු වාර්තාවේ සඳහන් කර ඇති රැකියා ආශ්‍රිත වියදම් නිවැරදි නම් සහ ඒවා සනාථ කිරීමට අවශ්‍ය ලේඛන පවතින්නේ නම්, එම අදාළ පුද්ගලයන්ට වෙනත් ක්‍රියාමාර්ගයක් ගැනීමට අවශ්‍ය නොවන බවයි ATO ආයතනය සඳහන් කරන්නේ.

කෙසේ වෙතත්, බදු වාර්තාවේ වැරදි තොරතුරු ඇතුළත් කර ඇති බව හෝ සැබෑ වියදමට වඩා වැඩි මුදලක් සඳහන් කර ඇති බව හඳුනාගතහොත්, එම වැරදි නිවැරදි කර බදු වාර්තාව සංශෝධනය කළ යුතු වන අතර, අදාළ ලිපියේ සඳහන් කාලසීමාව තුළ එම සංශෝධන සිදු නොකළහොත් දඩ මුදල් අය කිරීමට පියවර ගන්නා බවත් එම ආයතනය අවධාරණය කරනවා.

විශේෂයෙන් නිවසේ සිට රාජකාරි කිරීමේදී දැරූ වියදම්, රැකියා කටයුතු සඳහා වාහන භාවිත කිරීම, රැකියාවට අවශ්‍ය ඇඳුම් මිලදී ගැනීම සහ රැකියාවට සම්බන්ධ අධ්‍යාපන කටයුතු සඳහා වැය කළ මුදල් වෙනුවෙන් ඉල්ලා ඇති බදු සහන පිළිබඳ ව ATO ආයතනය වැඩි අවධානයක් යොමුකර තිබෙනවා.

මේ අතර, 2026–27 ආදායම් වර්ෂයේ සිට සුදුසුකම් ලබන බදු ගෙවන්නන්ට රැකියාවට අදාළ වියදම් වෙනුවෙන් ඩොලර් 1,000ක සම්මත බදු අඩුකිරීමක් ලබාගැනීමේ නව ක්‍රමවේදයක් හඳුන්වා දී තිබෙනවා. කෙසේ වෙතත්, මෙම නව බදු සහනය 2025–26 ආදායම් වර්ෂයට අදාළ බදු වාර්තා සඳහා හිමි නොවන බවයි වාර්තා වන්නේ.