යුරෝපය පුරා මගී ගුවන් යානා රැසක් ඉලක්ක කරමින් එල්ල වූ බෝම්බ තර්ජන මාලාවක් හේතුවෙන් ජාත්‍යන්තර ගුවන් සේවා ක්ෂේත්‍රයේ දැඩි ආරක්ෂක අවදානමක් මතුව තිබෙනවා.

ඊයේ යුරෝපයේ ගුවන් ගමන් 25කට වැඩි සංඛ්‍යාවකට බෝම්බ තර්ජන එල්ල වී ඇති අතර, ඇතැම් ගුවන් යානා හදිසියේ වෙනත් ගුවන්තොටුපළ වෙත හරවා යැවීමටත්, යුද ප්‍රහාරක ගුවන් යානා යොදාගෙන ආරක්ෂාව සැපයීමටත් සිදුව තිබෙනවා.

මේ අතර, ඔස්ට්‍රේලියාවේ Sydney ජාත්‍යන්තර ගුවන්තොටුපළේ ද විශේෂ ආරක්ෂක මෙහෙයුමක් ක්‍රියාත්මක කර තිබෙනවා.

ජපානයේ Tokyo සිට Sydney බලා පැමිණි All Nippon Airways (ANA) ගුවන් සේවයට අයත් NH899 ගුවන් යානය ඊයේ රාත්‍රී 8ට පමණ ගොඩබැස්වීමෙන් අනතුරුව සන්නද්ධ Australian Federal Police (AFP) නිලධාරීන් විශේෂ පරීක්ෂාවක් සිදුකර තිබෙනවා.

මගීන්ට පැය එකහමාරකට ආසන්න කාලයක් ගුවන් යානය තුළ රැඳී සිටීමට සිදුව ඇති අතර, අනතුරුව ඔවුන්ගේ ගමන් මලු පොලිස් නිල සුනඛයන් යොදා පරීක්ෂා කර තිබෙනවා.

AFP තහවුරු කර ඇත්තේ ගුවන්තොටුපළට එල්ල වූ තර්ජන හේතුවෙන් මෙම ආරක්ෂක පරීක්ෂණ සිදුකළ බවයි.

පරීක්ෂණවලින් අනතුරුව ගුවන්තොටුපළේ සහ ගුවන් යානයේ සාමාන්‍ය මෙහෙයුම් නැවත ආරම්භ කිරීමට අවසර ලබාදී තිබෙනවා.

යුරෝපයේ Ryanair, Wizz Air, Aer Lingus, Finnair සහ තවත් ගුවන් සේවා රැසක් මෙම තර්ජනවලට මුහුණදී තිබෙනවා.

ඉතාලිය, ප්‍රංශය සහ බල්ගේරියාව ඇතුළු රටවල ආරක්ෂක අංශ හදිසි මෙහෙයුම් දියත් කර තිබුණත්, මේ දක්වා පරීක්ෂා කළ කිසිදු ගුවන් යානයකින් පුපුරණ ද්‍රව්‍ය හමුවී නැහැ.

මෙම තර්ජන පිටුපස සිටින්නේ කවුරුන්ද යන්න මෙතෙක් තහවුරු වී නොමැති අතර, Sydney සිද්ධිය සහ යුරෝපයේ බෝම්බ තර්ජන අතර සෘජු සම්බන්ධයක් තිබෙන බවට ද නිල තහවුරු කිරීමක් ලැබී නැහැ.