ඔස්ට්‍රේලියාවේ ප්‍රධාන අඩු වියදම් ගුවන් සේවාවක් වන Jetstar සමාගම, 2027 පෙබරවාරි 2 වැනිදා සිට ගුවන් මගීන්ගේ අතේ ගෙන යන ගමන් මලු (Carry-on Baggage) සම්බන්ධයෙන් නව නීති ක්‍රියාත්මක කිරීමට තීරණය කර තිබෙනවා.

ඒ අනුව දැනට ක්‍රියාත්මක වන කිලෝග්‍රෑම් 7ක අත් ගමන් මලු බර සීමාව ඉවත් කෙරෙන අතර, ගුවන් යානයේ ඉහළින් ඇති ගමන් මලු ගබඩා කිරීමේ ස්ථාන (Overhead Lockers) භාවිත කිරීමට ඇතැම් මගීන්ට අමතර ගාස්තුවක් ගෙවීමට සිදුවනු ඇති.

නව ක්‍රමය යටතේ සෑම මගියෙකුටම ආසනය යට තැබිය හැකි කුඩා ගමන් මල්ලක් නොමිලේ රැගෙන යාමට අවසර හිමිවන අතර, එහි උපරිම ප්‍රමාණය සෙන්ටිමීටර් 40 × 30 × 20ක් විය යුතුයි.

එක් මල්ලක බර කිලෝග්‍රෑම් 10 නොඉක්මවිය යුතු බවද Jetstar සමාගම සඳහන් කරනවා.

කෙසේ වෙතත්, කුඩා සූට්කේසයක් හෝ විශාල ගමන් මල්ලක් ගුවන් යානයේ ඉහළ ගබඩා ස්ථානයේ තැබීමට අවශ්‍ය මගීන්ට Priority Carry-on නමින් හඳුන්වාදෙන නව සේවාව මිලදී ගැනීමට සිදුවනවා.

එම සේවාව සඳහා ගුවන් ගමන් මාර්ගය අනුව ඩොලර් 25 සිට 52 දක්වා අමතර මුදලක් අය කළ හැකි අතර, එය මිලදී ගන්නා මගීන්ට ප්‍රමුඛතාව මත ගුවන් යානයට ඇතුළුවීමේ අවස්ථාව ද හිමිවෙනවා.

නව නීති ක්‍රියාත්මක වීමත් සමඟ ගුවන් තොටුපොළේ Boarding Gate අසල සියලුම මගීන්ගේ අතේ ගෙන යන ගමන් මලුවල බර පරීක්ෂා කිරීමේ ක්‍රමය ද වෙනස් වනු ඇති අතර, ගමන් මලුවල ප්‍රමාණය සහ අවසර ලත් මලු සංඛ්‍යාව පිළිබඳ වැඩි අවධානයක් යොමු කෙරෙනවා.

මේ අතර, 2026 අගෝස්තු 5ට පෙර වෙන්කරවාගත්, 2027 පෙබරවාරි 2 හෝ ඉන්පසු පිටත්වන ගුවන් ගමන් සඳහා මගීන්ට අමතර ගාස්තුවකින් තොරව Priority Carry-on පහසුකම ලබාදීමට ද Jetstar සමාගම තීරණය කර තිබෙනවා.

මෙම වෙනස්කම් Jetstar Airways (JQ) ගුවන් ගමන් සඳහා අදාළ වන අතර, Jetstar Japan ගුවන් සේවාවේ දැනට පවතින නීති වෙනස් නොවන බව සමාගම සඳහන් කරනවා.