ඔස්ට්‍රේලියාවේ ඓතිහාසික හමුදා කඳවුරු කිහිපයක් පෞද්ගලික අංශයට විකිණීමට ගෙන තිබූ තීරණය වෙනස් කිරීමට අගමැති ඇන්තනි ඇල්බනීසිගේ රජය තීරණය කර තිබෙනවා.

ඒ අනුව Sydney සහ Melbourne නගරවල පිහිටි ඓතිහාසික Victoria Barracks ඇතුළු ආරක්ෂක හමුදා දේපළ හතරක් තවදුරටත් රජයේ මහජන අයිතිය යටතේ පවත්වාගෙන යාමට නියමිත බවටයි සදහන් වන්නේ .

මෙම තීරණයට Victoria Barracks Sydney, Victoria Barracks Melbourne, Fort Queenscliff සහ Point Cook හි පිහිටි RAAF Williams කඳවුරු ඇතුළත් බවටයි වාර්තා වන්නේ .

ආරක්ෂක අමාත්‍යාංශය විසින් හඳුනාගත් භාවිතය අඩු සහ නඩත්තු වියදම් අධික හමුදා දේපළ 67ක් විකිණීම හරහා රජය ඩොලර් බිලියන 1.8ත් 3ත් අතර මුදලක් උපයා ගැනීමට සැලසුම් කර තිබුණ බවටයි අනාවරණ වන්නේ .

කෙසේ වෙතත්, ඓතිහාසික හමුදා උරුමයන් විකිණීමට එරෙහිව හිටපු අගමැතිවරුන්, යුද හමුදා ප්‍රවීණයන්, දේශපාලන නායකයන් සහ මහජනතාවගෙන් දැඩි විරෝධයක් එල්ල වූ බවට සදහන් .

එම විරෝධතා සැලකිල්ලට ගනිමින් මෙම ස්ථාන විකිණීම අත්හිටුවීමට රජය තීරණය කර තිබෙනවා.

අගමැති Anthony Albanese පවසන්නේ සිඩ්නිහි Victoria Barracks ඔස්ට්‍රේලියාවේ ජාතික ඉතිහාසයේ සුවිශේෂී ස්ථානයක් හිමි කරගන්නා බවයි.

ආරක්ෂක අමාත්‍ය රිචඩ් මාර්ල්ස් සඳහන් කරන්නේ ආරක්ෂක වියදම් වඩාත් ඵලදායී ලෙස යොදාගැනීම සඳහා එම ස්ථානවලින් හමුදා නිලධාරීන් ඉවත් කර, ඉදිරියේදී මහජනතාවට විවෘත කිරීමට සහ ඓතිහාසික උරුමයන් සංරක්ෂණය කිරීමට සැලසුම් කර ඇති බවයි.

මෙම ස්ථානවල ඉතිහාසය අනාගත පරපුරට හඳුන්වාදීම සඳහා Australian War Memorial ආයතනයේ සහාය ද ලබාගැනීමට රජය අපේක්ෂා කරන බවටයි වාර්තා වන්නේ .

කෙසේ වෙතත්, මෙම හමුදා කඳවුරු රජයේ අයිතිය යටතේ පැවතියද, ඒවා තවදුරටත් සක්‍රීය හමුදා කඳවුරු ලෙස පවත්වාගෙන යන්නේද යන්න පිළිබඳව දේශපාලන විවාදයක් තවමත් පවතින බවට සදහන් .