ඔස්ට්‍රේලියාවේ ප්‍රාන්ත කිහිපයකට අද (07) සහ හෙට (08) දිනවල තද සුළං, අධික වැසි සහ ගිගුරුම් සහිත කුණාටු ඇතිවිය හැකි බවට Bureau of Meteorology (BOM) අනතුරු අඟවා තිබෙනවා.

ඒ අනුව, Victoria ප්‍රාන්තය හරහා ඊසාන දෙසට ගමන් කරන ශීත වායු පෙරමුණක් (Cold Front) හේතුවෙන් NSW සහ Queensland ප්‍රාන්තවල වෙරළබඩ ප්‍රදේශවල කාලගුණය සැලකිය යුතු ලෙස වෙනස් විය හැකි බවයි වාර්තා වන්නේ.

විශේෂයෙන් අද සවස් කාලයේ සිට Sydney නගරයට තද සුළං සමඟ වැසි සහ ගිගුරුම් සහිත කුණාටු ඇතිවිය හැකි අතර, NSW ප්‍රාන්තයේ ඇතැම් ප්‍රදේශවලට විශාල හිම කැට පතිත වීමේ අවදානමක් ද පවතිනවා.

Sydney නගරයේ උෂ්ණත්වය සෙල්සියස් අංශක 30කට ආසන්න මට්ටමක සිට සෙල්සියස් අංශක 10කින් පමණ හදිසියේ පහළ යා හැකි බවයි කාලගුණ විද්‍යාඥ David Crock පවසන්නේ.

NSW ප්‍රාන්තයේ Hunter ප්‍රදේශයට දිවා කාලයේදී දැඩි ලැව්ගිනි අවදානමක් පවතින පසුබිමක, සවස් කාලයේදී අධික වැසි හේතුවෙන් හානි සිදුවීමේ අවදානමක් ද පවතින බවයි BOM ආයතනය පවසන්නේ.

මේ අතර, Brisbane නගරයේ උතුරු ප්‍රදේශවලට සහ Queensland හි Wide Bay Burnett කලාපයේ ඇතැම් ප්‍රදේශවලට ද දරුණු ගිගුරුම් සහිත කුණාටු ඇතිවිය හැකි බවට අනාවැකි පළ වී තිබෙනවා.

එමෙන්ම, උතුරු ඔස්ට්‍රේලියාවේ Northern Territory සහ බටහිර ඔස්ට්‍රේලියාවේ Kimberley ඇතුළු ප්‍රදේශ රැසකට දැඩි උණුසුම් කාලගුණයක් බලපාමින් පවතිනවා.

බටහිර ඔස්ට්‍රේලියාවේ Marble Bar ප්‍රදේශයේ ඊයේ (06) සෙල්සියස් අංශක 46.5ක උෂ්ණත්වයක් වාර්තා වී ඇති අතර, එය එම ප්‍රදේශයේ නොවැම්බර් මාසයක වාර්තා වූ ඉහළම උෂ්ණත්වය බවයි සඳහන් වන්නේ.

හෙට (08) දිනයේදී Sydney නගරයේ උපරිම උෂ්ණත්වය සෙල්සියස් අංශක 19ක් සහ Melbourne නගරයේ උපරිම උෂ්ණත්වය සෙල්සියස් අංශක 17ක් වනු ඇතැයි අපේක්ෂා කරන බවයි BOM ආයතනය වැඩිදුරටත් පවසන්නේ.