ඔස්ට්‍රේලියාවේ Melbourne නගර මධ්‍යයේ ඊයේ (06) රාත්‍රියේ සිදුවූ පිහි ඇනුමකින් පුද්ගලයෙකු මියගොස් තවත් පුද්ගලයෙකු තුවාල ලබා රෝහල්ගත කර තිබෙනවා.

Victoria පොලිසිය සඳහන් කරන්නේ රාත්‍රී 8 පසුවී සුළු වේලාවකින් Queen Victoria Market ආසන්නයේ Frederick Way ප්‍රදේශයේ සිදුවීමක් සම්බන්ධයෙන් හදිසි සේවා අංශ වෙත දැනුම්දීමක් ලැබී ඇති බවයි.

එහිදී පිහි ඇනුම් තුවාල සහිතව සිටි පුද්ගලයෙකුට හදිසි වෛද්‍ය සේවා අංශ ප්‍රතිකාර ලබාදුන්නද, ඔහු එම ස්ථානයේදීම මියගොස් තිබෙනවා.

ඉන් සුළු වේලාවකට පසුව ඒ ආසන්නයේදී පිහි ඇනුමකින් තුවාල ලැබූ බවට සැක කෙරෙන වයස අවුරුදු 30ත් 39ත් අතර තවත් පුද්ගලයෙකු සොයාගෙන ඇති අතර, ඔහු ප්‍රතිකාර සඳහා රෝහල්ගත කර තිබෙනවා.

සිද්ධියෙන් මියගිය පුද්ගලයාගේ අනන්‍යතාව මෙතෙක් අනාවරණය වී නොමැති අතර, ප්‍රහාරය කිසියම් පුද්ගලයෙකු ඉලක්ක කර සිදුකළ එකක් ද යන්න පිළිබඳව විමර්ශන ආරම්භ කර තිබෙන බවයි සදහන්.

සිද්ධියෙන් අනතුරුව Queen Street සහ A’Beckett Street අතර ප්‍රදේශයට පිවිසීම සීමා කරමින් පොලිසිය එම ස්ථානයේ විමර්ශන ආරම්භ කර තිබෙන බවයි වාර්තා වන්නේ.

සිද්ධිය සම්බන්ධයෙන් මෙතෙක් කිසිවෙකු අත්අඩංගුවට ගෙන නොමැති අතර, තොරතුරු දන්නා පුද්ගලයන්ට Crime Stoppers අංක 1800 333 000 ඔස්සේ දැනුම් දෙන ලෙස පොලිසිය ඉල්ලා සිටිනවා.