ඔස්ට්‍රේලියාවේ ජීවන වියදම් පීඩනය ඉහළ යන පසුබිමක, AI දත්ත මධ්‍යස්ථාන ඉදිකිරීම තාවකාලිකව අත්හිටුවන ලෙස Greens පක්ෂය යෝජනාවක් ඉදිරිපත් කර තිබෙනවා.

එම දත්ත මධ්‍යස්ථාන ව්‍යාප්ත කිරීම සඳහා සිදුකරන අධික ආයෝජන, ජීවන වියදම් පීඩනය ඉහළ යාමට දායක වන බවයි එම පක්ෂය පෙන්වා දෙන්නේ..

මේ අතර, මෙම සතියේ පොලී අනුපාත ඉහළ නැංවීමේ තීරණයෙන් පසු අදහස් දක්වමින් ඔස්ට්‍රේලියානු සංචිත බැංකුවේ (RBA) අධිපතිනි Michele Bullock සඳහන් කර ඇත්තේ, දත්ත මධ්‍යස්ථාන ඇතුළු ක්ෂේත්‍රවල අපේක්ෂා කළ ප්‍රමාණයට වඩා ඉහළ ආයෝජන, උද්ධමන පීඩනය වැඩි කිරීමට දායක වී ඇති බවයි.

Deloitte Access Economics ආයතනයට අනුව, ඔස්ට්‍රේලියාවේ සැලසුම්ගත සමස්ත ආයෝජන ව්‍යාපෘතිවල වටිනාකම වාර්තාගත ඔස්ට්‍රේලියානු ඩොලර් ට්‍රිලියන 1.39ක් දක්වා ඉහළ ගොස් ඇති අතර, ඉන් ඩොලර් බිලියන 141ක් දත්ත මධ්‍යස්ථාන ව්‍යාපෘති සඳහා වෙන් කර තිබෙනවා.

Greens පක්ෂයේ නායක David Shoebridge පවසන්නේ, ප්‍රමාණවත් මහජන අදහස් විමසුමකින් තොරව දත්ත මධ්‍යස්ථාන ව්‍යාප්ත කිරීමට ෆෙඩරල් රජය හා ප්‍රාන්ත රජයන් සහය දක්වමින් සිටින බවයි.

මෙම ව්‍යාපෘති හරහා විදේශීය තාක්ෂණික සමාගම්වලට ඔස්ට්‍රේලියාවේ ජලය, විදුලිය, දත්ත සහ රැකියා සම්බන්ධයෙන් අධික බලපෑමක් ඇති කිරීමට අවස්ථාව ලැබෙන බවට ද ඔහු චෝදනා කර තිබෙනවා.

ඒ අනුව, නව AI දත්ත මධ්‍යස්ථාන ඉදිකිරීම වහා ම තාවකාලිකව අත්හිටුවිය යුතු බවයි Greens පක්ෂය අවධාරණය කරන්නේ.