ඔස්ට්‍රේලියාවේ Victoria ප්‍රාන්තයේ නීතිවිරෝධී දුම්කොළ වෙළෙඳාම සම්බන්ධයෙන් පවතින ගැටුම් සහ ඒ හේතුවෙන් සිදුවන බවට චෝදනා එල්ල වී ඇති වෙළෙඳසැල් හා නිවාස ගිනි තැබීමේ ප්‍රහාර මැඩපැවැත්වීම සඳහා විපක්ෂ Liberal පක්ෂය නව යෝජනාවක් ඉදිරිපත් කර තිබෙනවා.

විපක්ෂ නායිකා Jess Wilson සඳහන් කරන්නේ ඉදිරි ප්‍රාන්ත මැතිවරණයෙන් තම පක්ෂය ජයග්‍රහණය කළහොත්, නීතිවිරෝධී දුම්කොළ අලෙවි කරන වෙළෙඳසැල් තාවකාලිකව වසා තැබිය හැකි උපරිම කාලය දින 90 සිට දින 150 දක්වා දීර්ඝ කරන බවයි.

එමෙන්ම එවැනි වෙළෙඳසැල් වසා දැමීමට නියෝග නිකුත් කළ වහාම, කිසිදු වන්දියක් නොගෙවා අදාළ කුලී ගිවිසුම් අවලංගු කිරීමට ගොඩනැගිලි හිමියන්ට නීතිමය අවසර ලබාදීමට ද යෝජනා කර තිබෙනවා.

නීතිවිරෝධී දුම්කොළ අලෙවි කරන හෝ බලපත්‍ර නොමැතිව ක්‍රියාත්මක වන වෙළෙඳසැල්වල ATM යන්ත්‍ර තහනම් කිරීම සහ නීති උල්ලංඝනය කිරීම් හඳුනාගත් අවස්ථාවල දුම්කොළ හා Vape දුම්වැටි නිෂ්පාදන සියල්ල රාජසන්තක කිරීමට බලධාරීන්ට අවසර ලබාදීම ද මෙම සැලැස්මට ඇතුළත් බවයි සදහන්.

වික්ටෝරියාවේ ව්‍යාපාරික ස්ථාන සහ නිවාස 300කට පමණ එල්ල වී ඇති ගිනි තැබීමේ ප්‍රහාර සමඟ මෙම නීතිවිරෝධී ජාවාරම සම්බන්ධ බවටයි Liberal පක්ෂය චෝදනා කරන්නේ.

සංවිධානාත්මක අපරාධ මැඩලීම සඳහා යෝජිත RICO නීති යටතේ නීතිවිරෝධී දුම්කොළ අලෙවිය වෙනම අපරාධයක් ලෙස නම් කිරීමට ද ඔවුන් යෝජනා කර තිබෙනවා.

වත්මන් Labour රජය මෙම ජාවාරම පාලනය කිරීමට අපොහොසත් වී ඇති බවට චෝදනා කරන විපක්ෂ නායිකාව, තම පක්ෂය බලයට පත්වුවහොත් එවැනි වෙළෙඳසැල් වසා දැමීමට බලධාරීන්ට වැඩි බලතල ලබාදෙන බවටයි ප්‍රකාශ කර තිබෙන්නේ.