ඔස්ට්‍රේලියාවේ Adelaide නගරයේ දකුණු ප්‍රදේශයක සිදුවූ බිහිසුණු රිය අනතුරකින් 29 හැවිරිදි කාන්තාවක් ජීවිතක්ෂයට පත්ව තිබෙනවා.

ඊයේ (06) අලුයම 4ට පමණ Flagstaff Hill ප්‍රදේශයේ Manning Road මාර්ගයේ ගමන් කරමින් තිබූ Kia වර්ගයේ මෝටර් රථයක් ගසක ගැටී ගිනිගෙන ඇති බවයි වාර්තා වන්නේ.

අනතුරෙන් මියගොස් ඇත්තේ Port Noarlunga ප්‍රදේශයේ පදිංචි 29 හැවිරිදි කාන්තාවක් බවයි සඳහන්.

අනතුරත් සමඟ ඇති වූ විශාල පිපිරුම් හඩකින් අවට පදිංචිකරුවන් අවදි වී ඇති අතර, ඔවුන් වහාම අනතුර සිදුවූ ස්ථානයට පැමිණ මෝටර් රථය තුළ සිරවී සිටි කාන්තාව බේරාගැනීමට උත්සාහ කර තිබෙනවා.

කෙසේ වෙතත්, මෝටර් රථය දැඩි ලෙස ගිනිගෙන තිබීම හේතුවෙන් එම උත්සාහයන් අසාර්ථක වී ඇති අතර, කාන්තාව අනතුර සිදුවූ ස්ථානයේදීම ජීවිතක්ෂයට පත්ව ඇති බවයි වාර්තා වන්නේ.

පොලීසිය සැක පළ කරන්නේ මෝටර් රථය ගසක ගැටීමට පෙර, මීටර් 200ක් පමණ ඈතින් පිහිටි පදික මාරුවක් ආසන්නයේ තිබූ ලෝහ ආරක්ෂක වැටක ද ගැටී ඇති බවයි.

අනතුර සිදුවූ ස්ථානයේ තිරිංග යෙදීමෙන් ඇතිවන ටයර් සලකුණු දක්නට නොලැබුණු බව සඳහන් වන අතර, අනතුරට නිශ්චිත හේතුව සොයා විමර්ශනයක් ආරම්භ කර තිබෙනවා.

විමර්ශන කටයුතු හේතුවෙන් Manning Road මාර්ගයේ Emerald Street සහ Topaz Drive අතර කොටස තාවකාලිකව වසා දැමීමට පියවර ගෙන තිබූ අතර, මේ වනවිට එය නැවත විවෘත කර ඇති බවයි වාර්තා වෙන්නේ.