ඔස්ට්‍රේලියාවේ Brisbane නගරයට ආසන්න Browns Plains ප්‍රදේශයේ අවමංගල්‍ය ශාලාවක තැන්පත් කර තිබූ පියෙකුගේ මළසිරුරෙන් කොටසක් කපා ඉවත් කළ බවට ඔහුගේ පුත්‍රයා ඇතුළු ඥාතීන් තිදෙනෙකුට චෝදනා එල්ල වී තිබෙනවා.

Logan ප්‍රදේශයේ පිහිටි Swanborough Funerals අවමංගල්‍ය ශාලාවේදී මෙය සිදුවී ඇති බවයි පොලීසිය පවසන්නේ.

මියගිය පුද්ගලයාගේ දේහය දැකබලා ගැනීමට පැමිණි ඥාතීන් තිදෙනෙකු, සංස්කෘතික චාරිත්‍ර කිහිපයක් ඉටුකිරීමට අවශ්‍ය බව පවසමින් අවමංගල්‍ය ශාලාවේ හිමිකාරියට එම ස්ථානයෙන් ඉවත්වන ලෙස ඉල්ලා තිබෙනවා.

අනතුරුව කතුරු, සැත්කම් සඳහා භාවිත කරන පිහි සහ තියුණු තල උපයෝගී කරගනිමින් මළසිරුරෙන් කොටසක් ඉවත් කර ඇති බවට පොලීසිය චෝදනා කරනවා.

සිද්ධිය අනාවරණය වීමත් සමඟ මියගිය පුද්ගලයාගේ පුත්‍රයා එම ස්ථානයෙන් පලාගොස් ඇති අතර, පැය පහකට පමණ පසු පොලීසිය ඔහු අත්අඩංගුවට ගෙන තිබෙනවා.

අනෙක් සැකකරුවන් දෙදෙනා ද එම ස්ථානයේදීම අත්අඩංගුවට ගෙන ඇති බවයි වාර්තා වන්නේ.

මළසිරුරකට අගෞරව කිරීම, අපරාධයක් සිදුකිරීමේ අරමුණින් ගොඩනැගිල්ලකට ඇතුළුවීම සහ ආයුධ සන්නද්ධව සිටීම ඇතුළු චෝදනා යටතේ ඔවුන් තිදෙනා Brisbane Magistrates Court වෙත ඉදිරිපත් කර තිබෙනවා.

ඇප ඉල්ලීමක් ඉදිරිපත් කර නොමැති බැවින් ඔවුන් තවදුරටත් රක්ෂිත බන්ධනාගාරගතව සිටින අතර, මෙම සිදුවීමට හේතුව මෙතෙක් අනාවරණය වී නැහැ.

මේ අතර Central Queensland Universityහි අපරාධ විද්‍යා විශේෂඥ Dr Xanthe Weston පවසන්නේ මෙවැනි ක්‍රියාවක් සාධාරණීකරණය කළ හැකි සංස්කෘතික චාරිත්‍රයක් පිළිබඳ තමන් නොදන්නා බවයි.