ඔස්ට්‍රේලියාවේ Victoria ප්‍රාන්තයේ රජයේ රෝහල්වල සේවය කරන වෛද්‍යවරුන්, හෙදියන් ඇතුළු සෞඛ්‍ය සේවකයන්ට එල්ල වන ප්‍රචණ්ඩත්වය පසුගිය වසර හතර තුළ 60%කට වැඩි ප්‍රමාණයකින් ඉහළ ගොස් තිබෙනවා.

ඒ අනුව පසුගිය වසරේ පමණක් රෝහල් සේවකයන්ට එරෙහි ප්‍රචණ්ඩ සිදුවීම් 26,730ක් වාර්තා වී ඇති බව සඳහන්.

එය දිනකට සාමාන්‍යයෙන් සිදුවීම් 73කට ආසන්න සංඛ්‍යාවක් වන අතර, සේවකයන්ට පහරදීම, සපාකෑම සහ තර්ජනය කිරීම වැනි සිදුවීම් ඒ අතරට ඇතුළත්.

සමහර සිදුවීම්වලදී සෞඛ්‍ය සේවකයන් බරපතළ තුවාල ලබා ඇති අතර, එක් හෙදියකට එල්ල වූ ප්‍රහාරයකින් ඇගේ කම්මුල් අස්ථිය සහ කරපටිය අස්ථිය බිඳී ගොස් තිබෙනවා.

මේ අතර හදිසි ප්‍රතිකාර ඒකකවල සේවය කරන හෙදියන්ගෙන් 58%කට වැඩි පිරිසක් ප්‍රචණ්ඩත්වය හේතුවෙන් තම වෘත්තියෙන් ඉවත් වීම පිළිබඳව බරපතළ ලෙස සලකා බලමින් සිටින බව සමීක්ෂණයකින් හෙළි වී තිබෙනවා.

මෙම තත්ත්වය හමුවේ රෝහල්වල ආරක්ෂක නිලධාරීන් යෙදවීම, CCTV කැමරා සහ හදිසි අනතුරු ඇඟවීමේ උපකරණ වැඩි කිරීම ඇතුළු ආරක්ෂක පියවර ශක්තිමත් කිරීම පිළිබඳව අවධානය යොමුව තිබෙනවා.

ඒ අනුව රෝගීන්ට ප්‍රතිකාර ලබාදෙන සෞඛ්‍ය සේවකයන්ගේ ආරක්ෂාව තහවුරු කිරීම Victoria ප්‍රාන්තයේ සෞඛ්‍ය ක්ෂේත්‍රය මුහුණ දී ඇති ප්‍රධාන අභියෝගයක් බවට පත්ව තිබෙනවා.