විදේශයන්හි සිට ඉදිරිපත් කරන ඇතැම් වීසා අයදුම්පත් සලකා බැලීමේදී ලබාදෙන ප්‍රමුඛතාව අඩු කිරීමට ඔස්ට්‍රේලියානු රජය තීරණය කිරීමත් සමඟ ඔස්ට්‍රේලියාවට සංක්‍රමණය වීමේ බලාපොරොත්තුවෙන් සිටින විදේශිකයන් රැසකට සිය වීසා අයදුම්පත් සම්බන්ධයෙන් තවදුරටත් ප්‍රමාදයන්ට මුහුණදීමට සිදුවන තත්ත්වයක් මතුව තිබෙනවා.

ඒ අනුව, ඔස්ට්‍රේලියාවෙන් පිටත සිට Partner Visa සඳහා අයදුම් කරන පුද්ගලයන්ට, ඔස්ට්‍රේලියාව තුළ සිට අයදුම් කරන පුද්ගලයන්ට වඩා අඩු ප්‍රමුඛතාවක් හිමිවන බවයි සඳහන් වන්නේ.

මේ හේතුවෙන් ඔස්ට්‍රේලියානු පුරවැසියන් සමඟ විවාහ වී සිටින විදේශිකයන්ට පවා සිය සහකරුවන්ගෙන් වෙන්ව දිගු කාලයක් බලා සිටීමට සිදුව තිබෙනවා.

නවතම වාර්තා අනුව, විදේශයන්හි සිට ඉදිරිපත් කරන Partner Visa අයදුම්පත්වලින් 90%ක් සලකා බැලීමට මාස 39ක් දක්වා කාලයක් ගතවිය හැකි බවයි සඳහන් වන්නේ.

කෙසේ වෙතත්, ඔස්ට්‍රේලියාව තුළ සිට ඉදිරිපත් කරන අයදුම්පත්වලින් 90%ක් සලකා බැලීමට ගතවන කාලය මාස 29ක් පමණ වන බවත් වාර්තා වෙනවා.

මේ අතර, Queensland ප්‍රාන්තයේ රැකියාවක් සඳහා අනුග්‍රහය ලැබූ දකුණු අප්‍රිකානු ජාතික කාර්මික ශිල්පියෙකු ඇතුළු Skilled Visa අයදුම්කරුවන්ට ද මාස ගණනක් තිස්සේ තීරණයක් බලා සිටීමට සිදුව ඇති පුවතක් වාර්තා වෙනවා.

මෙම ප්‍රමාදයන් හේතුවෙන් ඇතැම් පවුල්වලට නිවාස විකිණීම, රැකියා අත්හැරීම සහ දරුවන්ගේ අධ්‍යාපන සැලසුම් කල් දැමීම වැනි ගැටලුවලට මුහුණදීමට සිදුව තිබෙනවා.

කෙසේ වෙතත් ඔස්ට්‍රේලියානු Home Affairs දෙපාර්තමේන්තුව පවසන්නේ විදේශයන්හි සිට ඉදිරිපත් කරන අයදුම්පත් ද සලකා බලන නමුත් රජයේ සංක්‍රමණ ප්‍රමුඛතා අනුව ඒවායේ අනුපිළිවෙළ තීරණය කරන බවයි.