ඔස්ට්‍රේලියාවේ දරුවන් ඉලක්ක කරගනිමින් Protein Powder සහ Protein Supplements අලෙවි කිරීම ඉහළ යමින් පවතින අතර, බොහෝ දරුවන්ට මෙවැනි අතිරේක පෝෂණ නිෂ්පාදන අවශ්‍ය නොවන බව සෞඛ්‍ය විශේෂඥයන් පෙන්වා දෙනවා.

ළමා පෝෂණවේදිනී Dr Kyla Smith පවසන්නේ ඔස්ට්‍රේලියානු දරුවන්ගෙන් සියයට 99කට වැඩි පිරිසක් සාමාන්‍ය ආහාර වේලෙන්ම තමන්ට අවශ්‍ය ප්‍රෝටීන් ප්‍රමාණය ලබාගන්නා බවයි.

කිරි, බිත්තර, යෝගට්, කුකුළු මස් සහ මාළු වැනි සාමාන්‍ය ආහාර මගින් දරුවන්ගේ වර්ධනයට අවශ්‍ය ප්‍රෝටීන් පහසුවෙන් ලබාගත හැකි බැවින්, අතිරේක Protein Powder ලබාදීම බොහෝ අවස්ථාවල අනවශ්‍ය බව ඇය සඳහන් කරනවා.

මේ අතර Social Media ඔස්සේ ජනප්‍රිය පුද්ගලයන් සහ Influencers යොදාගනිමින් දරුවන් සඳහා Protein Supplements ප්‍රවර්ධනය කිරීම පිළිබඳව ද විශේෂඥයන් කනස්සල්ල පළ කර තිබෙනවා.

වෛද්‍ය Dr Mani Upadhyaya පවසන්නේ දරුවන්ගේ වර්ධනය සහ පෝෂණය පිළිබඳ දෙමාපියන් තුළ ඇති කනස්සල්ල ඇතැම් සමාගම් අලෙවිකරණය සඳහා භාවිත කරන බවයි.

අවශ්‍ය ප්‍රමාණයට වඩා ප්‍රෝටීන් අතිරේක ලබාදීමෙන් දරුවන්ට බඩ පිපීම, මලබද්ධය, ආහාර රුචිය අඩුවීම සහ අනවශ්‍ය ලෙස බර වැඩිවීම වැනි ගැටලු ඇතිවිය හැකි බවට ද විශේෂඥයන් අනතුරු අඟවනවා.

සාමාන්‍යයෙන් දරුවෙකුට දිනකට තම ශරීර බර කිලෝග්‍රෑමයකට ප්‍රෝටීන් ග්‍රෑම් එකක් පමණ අවශ්‍ය වන අතර, එම ප්‍රමාණය දරුවාගේ වයස සහ ක්‍රියාකාරීත්වය අනුව වෙනස් විය හැකියි.

කෙසේ වෙතත්, දරුවෙකුගේ වර්ධනය හෝ පෝෂණය සම්බන්ධයෙන් සැබෑ ගැටලුවක් පවතින්නේ නම්, වෛද්‍යවරයෙකුගේ හෝ ළමා පෝෂණවේදියෙකුගේ උපදෙස් මත පමණක් මෙවැනි අතිරේක ලබාදිය යුතු බව ද විශේෂඥයන් අවධාරණය කරනවා.