පෝලන්තයේ ප්‍රධාන සංචාරක නගරයක් වන Krakow හි සිදුවූ දරුණු වෙඩි තැබීමකින් පුද්ගලයින් හයදෙනෙකු මියගොස් තවත් 16 දෙනෙකු තුවාල ලබා තිබෙනවා.

Krakow නගරයේ ඓතිහාසික Main Square ප්‍රදේශයට මෝටර් රථයකින් පැමිණි 25 හැවිරිදි පෝලන්ත ජාතිකයෙකු ස්වයංක්‍රීය ගිනි අවියකින් ජනතාව ඉලක්ක කර වෙඩි තබා ඇති බවයි පොලීසිය පවසන්නේ.

මියගිය පුද්ගලයින් අතර කාන්තාවන් හතරදෙනෙකු සහ පිරිමින් දෙදෙනෙකු සිටින අතර, තුවාල ලැබූවන් අතර පොලිස් නිලධාරීන් දෙදෙනෙකුද සිටිනවා.

සැකකරු පොලීසිය සමඟ ඇතිවූ වෙඩි හුවමාරුවකදී තුවාල ලබා අත්අඩංගුවට ගෙන රෝහල්ගත කර ඇති අතර, ඔහුගේ මෝටර් රථයෙන් තවත් ගිනි අවි සහ පතොරම් විශාල ප්‍රමාණයක් සොයාගෙන තිබෙනවා.

පෝලන්ත අභ්‍යන්තර කටයුතු අමාත්‍ය Marcin Kierwiński ප්‍රකාශ කර ඇත්තේ සැකකරු අන්ත දක්ෂිණාංශික මතවාද කෙරෙහි දැඩි උනන්දුවක් දැක්වූ පුද්ගලයෙකු බවට තොරතුරු අනාවරණය වී ඇති බවයි.

මේ අතර සැකකරුගේ නිවසේ තිබී තවත් පුද්ගලයින් තිදෙනෙකුගේ මළසිරුරු හමුවී ඇති අතර, ඔවුන් සැකකරුගේ පවුලේ සාමාජිකයන් විය හැකි බව පෝලන්ත අග්‍රාමාත්‍ය Donald Tusk ප්‍රකාශ කර තිබෙනවා.

සිද්ධිය සිදුවන අවස්ථාවේ එම ප්‍රදේශයේ සිටි Melbourne නුවර තරුණයෙකු වන Luca Nava ද වෙඩි හඬ ඇසීමත් සමඟ තම මිතුරා සමඟ ආරක්ෂිත ස්ථානයකට දිවගොස් දිවි බේරාගෙන තිබෙනවා.

මෙතෙක් ලැබී ඇති තොරතුරු අනුව ඕස්ට්‍රේලියානුවන් කිසිවෙකු මියගොස් හෝ තුවාල ලබා නොමැති අතර, ඕස්ට්‍රේලියානු විදේශ අමාත්‍ය Penny Wong සිද්ධිය සම්බන්ධයෙන් සිය ශෝකය පළකර තිබෙනවා.

පෝලන්ත ආරක්ෂක අමාත්‍යවරයා මෙම ප්‍රහාරය ත්‍රස්ත ක්‍රියාවක් ලෙස හඳුන්වා ඇති අතර, Krakow නගරයේ බදාදා දක්වා නිල ශෝක කාලයක් ප්‍රකාශයට පත්කර තිබෙනවා.