ඔස්ට්‍රේලියාවේ පුද්ගලික data ආරක්ෂාව සම්බන්ධයෙන් දැඩි අවධානයක් යොමුව තිබෙනවා.

2026 වසරේ පළමු මාස හය තුළ ලොව පුරා සිදුවූ, මිලියනයකට අධික පුද්ගලයන්ගේ තොරතුරු බලපෑමට ලක් කළ දත්ත උල්ලංඝනය කිරීම් 11ක් ඔස්ට්‍රේලියානු පෞද්ගලිකත්ව නියාමකයා වෙත වාර්තා වී තිබෙනවා.

ඔස්ට්‍රේලියානු තොරතුරු කොමසාරිස් කාර්යාලය (OAIC) නිකුත් කළ නවතම වාර්තාවට අනුව, 2026 ජනවාරි සිට ජුනි දක්වා කාලය තුළ දත්ත ආරක්ෂණ උල්ලංඝනය කිරීම් පිළිබඳ පැමිණිලි 667ක් ලැබී තිබෙනවා.

එය ඊට පෙර වාර්තාකරණ කාලසීමාවේ පැමිණිලි 662ට වඩා සුළු වැඩිවීමක් පෙන්නුම් කරන බවටයි සදහන් වන්නේ.

කෙසේ වෙතත්, වැඩිම අවධානයක් යොමුව ඇත්තේ එක් එක් දත්ත කඩවීම්වලට ලක්වන පුද්ගලයන්ගේ සංඛ්‍යාව වේගයෙන් ඉහළ යාම පිළිබඳවයි.

පුද්ගලයන් ලක්ෂයකත් දෙලක්ෂ පනස් දහසත් අතර පිරිසකට බලපෑම් කළ සිදුවීම් සංඛ්‍යාව තුනේ සිට හය දක්වා දෙගුණ වී තිබෙනවා.

එමෙන්ම පුද්ගලයන් පන්ලක්ෂයකටත් මිලියනයකටත් අතර පිරිසකට බලපෑම් කළ සිදුවීම් තුනක් ද වාර්තා වී තිබෙන බවටයි සදහන් .

මෙවැනි data උල්ලංඝනය කිරීම්වල ප්‍රධානතම හේතුව ලෙස සයිබර් අපරාධ සහ හිතාමතා සිදුකරන ප්‍රහාර හඳුනාගෙන තිබෙනවා.

අංශ අනුව සලකා බැලීමේදී වැඩිම data ආරක්ෂණ උල්ලංඝනය කිරීම් සංඛ්‍යාවක් වාර්තා වී ඇත්තේ සෞඛ්‍ය සේවා අංශයෙන් වන අතර එම සංඛ්‍යාව 149ක්.

අධ්‍යාපන අංශයෙන් සිදුවීම් 85ක් සහ ව්‍යාපාරික හා වෘත්තීය සංගම්වලින් සිදුවීම් 79ක් වාර්තා වී තිබෙනවා.

පුද්ගලයන්ගේ සම්බන්ධතා තොරතුරු, අනන්‍යතා ලේඛන සහ වෙනත් පුද්ගලික තොරතුරු මෙවැනි ප්‍රහාර හරහා අවදානමට ලක්විය හැකි බවයි බලධාරීන් පෙන්වා දෙන්නේ.

ඒ අනුව පුද්ගලික තොරතුරු රැස්කිරීම සහ ගබඩා කිරීම සීමා කිරීම, ශක්තිමත් සයිබර් ආරක්ෂණ ක්‍රමවේද අනුගමනය කිරීම සහ data කඩවීම් සිදුවූ විට කඩිනමින් ක්‍රියාත්මක වීමේ අවශ්‍යතාවක් ඔස්ට්‍රේලියානු බලධාරීන් අවධාරණය කරන්නේ .