තමන්ට අයත් ඉඩමක මියගිය පවුලේ සාමාජිකයන්ගේ මළසිරුරු භූමදානය කිරීම සම්බන්ධයෙන් නව නීතිමය කොන්දේසි හඳුන්වාදීමට South Australia ප්‍රාන්තයේ ප්‍රාදේශීය සභාවක් සූදානම් වනවා.

South Australiaහි Coorong District Council විසින් මෙම නව ප්‍රතිපත්ති යෝජනාව ඉදිරිපත් කර ඇති අතර, එමඟින් පවුල්වලට තමන්ට විශේෂ වැදගත්කමක් ඇති පෞද්ගලික ඉඩමක මියගිය ඥාතීන් භූමදානය කිරීමට අනුමැතිය ඉල්ලා සිටිය හැකි වනවා.

South Australia ප්‍රාන්තයේ නගර සීමාවලින් බැහැර පෞද්ගලික ඉඩම්වල මළසිරුරු භූමදානය කිරීමට දැනටමත් නීතිමය අවස්ථාව පවතින අතර, නව යෝජනාවේ අරමුණ එම ක්‍රියාවලිය සඳහා පැහැදිලි කොන්දේසි හඳුන්වාදීමයි.

කෙසේ වෙතත්, මෙහිදී වැදගත් නීතිමය අවදානමක්ද මතුව තිබෙනවා.

එනම්, අදාළ ඉඩම අනාගතයේදී වෙනත් පුද්ගලයෙකුට විකුණනු ලැබුවහොත් නව හිමිකරුට එහි ඇති සොහොන් බිම ආරක්ෂා කර පවත්වාගෙන යාමේ අනිවාර්ය වගකීමක් නොමැති වීමයි.

ඒ අනුව නව හිමිකරුට එම ස්ථානයේ ඉදිකිරීම් සිදුකිරීමට හෝ මළසිරුර ගොඩගැනීම සඳහා ඉල්ලීමක් කිරීමට හැකියාව පවතින අතර, මළසිරුරක් ගොඩගැනීමට South Australian Attorney-Generalගේ අනුමැතිය අවශ්‍ය වනවා.

එමෙන්ම ඉඩම විකුණා දැමීමෙන් පසු මියගිය පුද්ගලයාගේ ඥාතීන්ට සොහොන නැරඹීමට පවා නව හිමිකරුගේ අවසරය අවශ්‍ය විය හැකියි.

යෝජිත නීති අනුව නගර සීමාවන් තුළ මෙවැනි භූමදාන සිදුකළ නොහැකි අතර, ගොඩනැගිලි සහ ජල ළිංවල සිට අවම වශයෙන් මීටර් 20ක දුරක් සහ මතුපිට ජල මූලාශ්‍රවල සිට මීටර් 100ක දුරක් පවත්වාගත යුතු වනවා.

එක් ඉඩමක එක් භූමදාන ස්ථානයක් පමණක් අනුමත කළ හැකි නමුත්, එම ස්ථානයේ එකම පවුලේ සාමාජිකයන් කිහිපදෙනෙකු භූමදානය කිරීමට අවස්ථාව ලබාදීමට යෝජනා කර තිබෙනවා.

භූමදානය බලපත්‍රලාභී අවමංගල්‍ය සේවා සපයන්නෙකු මඟින් සිදුකළ යුතු අතර, සොහොන් බිම පිළිබඳ තොරතුරු ඉඩමේ නීතිමය හිමිකම් ලේඛනවලද සටහන් කළ යුතුයි.

මේ අතර Victoria ප්‍රාන්තයේ පෞද්ගලික ඉඩම්වල මළසිරුරු භූමදානය කිරීම සඳහා දැඩි නීතිමය සීමාවන් පවතින අතර, රජයේ අනුමැතියකින් තොරව එවැනි භූමදානයක් සිදුකිරීම හේතුවෙන් වසර පහක් දක්වා සිරදඬුවම් ලැබීමේ අවදානමක් පවතින බව ද වාර්තා වනවා.

Coorong District Council විසින් නව ප්‍රතිපත්ති යෝජනාව සම්බන්ධයෙන් මහජන අදහස් ලබාගැනීම අවසන් කර ඇති අතර, එය ක්‍රියාත්මක කරන්නේද යන්න පිළිබඳ අවසන් තීරණයක් ගැනීමට නියමිතයි.