ඔස්ට්‍රේලියාවේ PR ලබාගැනීමට බලාපොරොත්තුවෙන් සිටින සංක්‍රමණිකයන්ට වැදගත් වන 2026/27 State Nomination වැඩසටහන් සම්බන්ධයෙන් ප්‍රාන්ත රැසක් නවතම තොරතුරු ප්‍රකාශයට පත්කර තිබෙනවා.

විශේෂයෙන් Skilled Nominated Visa (Subclass 190) සහ Skilled Work Regional Visa (Subclass 491) සඳහා Victoria, Queensland සහ Tasmania ප්‍රාන්තවලින් වැදගත් නිවේදන නිකුත් වී තිබෙනවා.

Victoria ප්‍රාන්තය ඔක්තෝබර් 26 වැනිදා සිට Subclass 190 වීසා සඳහා Registration of Interest හෙවත් ROI භාරගැනීම ආරම්භ කර ඇති අතර, මෙවර ඒ සඳහා නාමයෝජනා ස්ථාන 900ක් වෙන්කර තිබෙනවා.

කෙසේ වෙතත්, Victoria ප්‍රාන්තයේ 491 වීසා වැඩසටහන සඳහා නාමයෝජනා සංඛ්‍යාව තවමත් අවසන් කර නොමැති බැවින් එම වීසා කාණ්ඩයේ නව ROI භාරගැනීම ආරම්භ කර නැහැ.

මේ අතර Queensland ප්‍රාන්තය නොවැම්බර් 6 වැනිදා සිට 190 සහ 491 වීසා කාණ්ඩ සඳහා නව ROI භාරගැනීම ආරම්භ කර තිබෙනවා.

එහිදී ඔස්ට්‍රේලියාව තුළ සිට අයදුම් කරන පුද්ගලයන් තම 2025/26 බදු වාර්තාව ඉදිරිපත් කර Australian Taxation Office වෙතින් Notice of Assessment ලබාගෙන තිබීම අත්‍යවශ්‍ය කර තිබෙනවා.

Tasmania ප්‍රාන්තයෙන්ද නොවැම්බර් 5 වැනිදා පැවැත්වූ නවතම Invitation Round එකේදී 190 වීසා සඳහා ආරාධනා 68ක් සහ 491 වීසා සඳහා ආරාධනා 28ක් නිකුත් කර තිබෙනවා.

එම ප්‍රාන්තයේ නවතම නිල දත්ත අනුව 190 වීසා සඳහා තවත් නාමයෝජනා ස්ථාන 828ක් සහ 491 වීසා සඳහා ස්ථාන 628ක් ඉතිරිව පවතිනවා.

Western Australia, South Australia, New South Wales සහ Canberra ප්‍රදේශවලද ඒ ඒ ප්‍රාන්තවල අවශ්‍යතා සහ සුදුසුකම් අනුව Skilled Migration අයදුම්කරුවන් තෝරාගැනීමේ වැඩසටහන් ක්‍රියාත්මක වනවා.

විශේෂයෙන් ඉදිකිරීම්, සෞඛ්‍ය, අධ්‍යාපන සහ අනෙකුත් අත්‍යවශ්‍ය වෘත්තීය ක්ෂේත්‍රවල සුදුසුකම් ඇති පුද්ගලයන්ට ප්‍රාන්ත අනුව වෙනස් අවස්ථා සහ ප්‍රමුඛතා හිමිවිය හැකියි.

කෙසේ වෙතත්, State Nomination සඳහා ROI හෝ EOI ඉදිරිපත් කිරීමෙන් පමණක් වීසා ආරාධනාවක් හෝ ස්ථිර පදිංචිය හිමි නොවන අතර, එක් එක් ප්‍රාන්තයේ රැකියා ලැයිස්තු, ලකුණු, පදිංචිය සහ සේවා පළපුරුද්ද ඇතුළු සුදුසුකම් සපුරාලිය යුතු බව බලධාරීන් අවධාරණය කරනවා.

ඒ අනුව 190 සහ 491 වීසා බලාපොරොත්තුවෙන් සිටින පුද්ගලයන් තමන් අයදුම් කිරීමට බලාපොරොත්තු වන ප්‍රාන්තයේ නවතම නිල නිවේදන පරීක්ෂා කිරීම වැදගත් වනවා.