ඔස්ට්‍රේලියාවේ නිවාස මිල ශීඝ්‍රයෙන් පහත වැටෙමින් පවතින පසුබිමක, නිවසක් මිලදී ගැනීමට බලාපොරොත්තුවෙන් සිටින පුද්ගලයන්ට මෙම වසරේ නත්තල් සමය ආසන්න කාලය වැදගත් අවස්ථාවක් විය හැකි බව ප්‍රමුඛ පෙළේ ආර්ථික විශේෂඥයෙකු පවසනවා.

Housing Industry Association (HIA) ආයතනයේ ප්‍රධාන ආර්ථික විද්‍යාඥ Tim Reardon, 7NEWSහි The Issue වැඩසටහනට එක්වෙමින් සඳහන් කළේ පළමු නිවස මිලදී ගැනීමට බලාපොරොත්තු වන පුද්ගලයන්ට මේ වනවිට සීමිත කාලීන අවස්ථාවක් නිර්මාණය වී ඇති බවයි.

Cotality ආයතනයේ නවතම දත්ත අනුව, ඔස්ට්‍රේලියාවේ නිවාස මිල මෙම වසරේ මාර්තු මාසයේ පැවති ඉහළම මට්ටමට සාපේක්ෂව සියයට 6.7කින් පහත වැටී තිබෙනවා.

මේ අතර Commonwealth Bank ආර්ථික විශ්ලේෂකයන් අනාවැකි පළ කරන්නේ සමස්ත නිවාස මිල පහත වැටීම සියයට 14ක් දක්වා ළඟාවිය හැකි බවයි.

නිවාස මිලදී ගැනීමට බලාපොරොත්තු වන පුද්ගලයන්ට දැනට පවතින අවස්ථාව මෙම වසරේ නත්තල් සමයෙන් ටික කලකට පසු අවසන් විය හැකි බවයි Tim Reardon පවසන්නේ.

ඔහුගේ විශ්ලේෂණයට අනුව Perth සහ Brisbane නගරවල නිවාස වෙළෙඳපොළ සාපේක්ෂව ඉක්මනින් යළි වර්ධනය විය හැකි අතර, පොලී අනුපාත වෙනස්වීම්වලට වැඩි සංවේදීතාවක් දක්වන Sydney වෙළෙඳපොළේ මිල පහත වැටීම තවදුරටත් පැවතිය හැකියි.

RBA විසින් මෙම වසරේ පස්වැනි වරටත් පොලී අනුපාත ඉහළ නැංවීමත් සමඟ නිල Cash Rate අගය සියයට 4.85ක් දක්වා ඉහළ ගොස් ඇති අතර, එය වසර 18කින් වාර්තා වූ ඉහළම මට්ටමයි.

එමෙන්ම 2027 වසරේ මුල් භාගයේදී තවත් පොලී අනුපාත වැඩිවීමක් සිදුවිය හැකි බවට ද Tim Reardon අනාවැකි පළ කර තිබෙනවා.

ඉහළ පොලී අනුපාත සහ නිවාස ආයෝජන සම්බන්ධ බදු ප්‍රතිපත්ති වෙනස්වීම් හේතුවෙන් 2027 වසරේදී නව නිවාස ඉදිකිරීම් අඩුවිය හැකි අතර, 2028 වසරේදී එම ක්ෂේත්‍රය යළි වර්ධනය වනු ඇතැයි ඔහු අපේක්ෂා කරනවා.

කෙසේ වෙතත්, නිවාස මිල තවදුරටත් පහත වැටීමේ හැකියාව පවතින බැවින්, නිවසක් මිලදී ගැනීමට තීරණය කිරීමේදී තම ආදායම, ණය ගෙවීමේ හැකියාව සහ අදාළ ප්‍රදේශයේ වෙළෙඳපොළ තත්ත්වය සැලකිල්ලට ගැනීම වැදගත් වනවා.