ලොව පුරා මැදිවියේ කාන්තාවන්ගෙන් සියයට 50ක් පමණ දිගුකාලීන ශාරීරික වේදනාවලින් පීඩා විඳින බව International Menopause Society (IMS) නිකුත් කළ නවතම වාර්තාවකින් අනාවරණය වී තිබෙනවා.

එම වාර්තාවට අනුව පිරිමින්ට සාපේක්ෂව කාන්තාවන්ට Chronic Pain හෙවත් මාස තුනකට වැඩි කාලයක් පවතින හෝ නැවත නැවත ඇතිවන වේදනා තත්ත්වයන් අත්විඳීමේ සම්භාවිතාව සියයට 70ක් දක්වා වැඩි විය හැකියි.

විශේෂයෙන් වයස අවුරුදු 40ත් 60ත් අතර කාලයේ සිදුවන හෝමෝන වෙනස්වීම්, ආර්තවහරණය (Menopause), නින්දේ ගැටලු සහ ජීවන රටාවේ වෙනස්කම් මෙවැනි වේදනා තත්ත්වයන්ට බලපාන බව විශේෂඥයන් පෙන්වා දෙනවා.

මෙම කාලයේදී කාන්තාවන් අතර සන්ධි සහ මාංශ පේශි වේදනා, කොන්දේ වේදනා, ඉරුවාරදය (Migraine), ශ්‍රෝණි ප්‍රදේශයේ වේදනා සහ ස්නායු ආශ්‍රිත වේදනා බහුලව වාර්තා වනවා.

වාර්තාවට අනුව ආර්තවහරණයට පෙර සංක්‍රාන්ති අවධියේ පසුවන කාන්තාවන් හතරදෙනෙකුගෙන් තුන්දෙනෙකුට ආසන්න පිරිසක් සන්ධි හෝ මාංශ පේශි වේදනා අත්විඳිනවා.

මේ අතර Chronic Pain Australia ආයතනය විසින් ඕස්ට්‍රේලියානුවන් 6,000කට වැඩි පිරිසක් යොදාගෙන සිදුකළ 2026 සමීක්ෂණයකින් හෙළිවී ඇත්තේ දිගුකාලීන වේදනාවලින් පීඩා විඳින කාන්තාවන් සාමාන්‍යයෙන් විවිධ වේදනා වර්ග 4.6ක් පමණ අත්විඳින බවයි.

කෙසේ වෙතත්, මෙම වේදනා තත්ත්වයන් බොහෝ අවස්ථාවල නිසි ලෙස හඳුනා නොගැනීම සහ ප්‍රමාණවත් ප්‍රතිකාර නොලැබීම බරපතළ ගැටලුවක් බව විශේෂඥයන් අවධාරණය කරනවා.

නිසි නින්දක් ලබාගැනීම, සමබර ආහාර වේලක් පවත්වාගෙන යාම, නිතිපතා ව්‍යායාම කිරීම සහ මානසික ආතතිය පාලනය කිරීම මඟින් ඇතැම් වේදනා තත්ත්වයන් අවම කරගැනීමට හැකි බව වෛද්‍යවරුන් පෙන්වා දෙනවා.

එමෙන්ම දිගුකාලීන වේදනාවක් පවතින්නේ නම් එය වයසට යාමේ සාමාන්‍ය ප්‍රතිඵලයක් ලෙස නොසලකා හැරීම වෙනුවට GP වෛද්‍යවරයෙකු හමුවී නිසි පරීක්ෂණ සහ ප්‍රතිකාර ලබාගැනීම වැදගත් බවද විශේෂඥයන් අවධාරණය කරනවා.