ඔස්ට්‍රේලියාවේ Victoria ප්‍රාන්තයේ පවුල් ප්‍රචණ්ඩත්වය වැළැක්වීමේ අරමුණින් නව නීති කිහිපයක් හඳුන්වාදීමට ප්‍රාන්ත Labor රජය මැතිවරණ පොරොන්දුවක් ලබාදී තිබෙනවා.

ඒ අනුව, නොවැම්බර් 28 වැනිදා පැවැත්වෙන ප්‍රාන්ත මැතිවරණයෙන් නැවත බලයට පත්වුවහොත්, Clare’s Law නමින් හැඳින්වෙන පවුල් ප්‍රචණ්ඩත්වය පිළිබඳ තොරතුරු හෙළිදරව් කිරීමේ නීතිය හඳුන්වාදීමට නියමිතයි.

මෙම යෝජිත නීතිය යටතේ තම සහකරු හෝ සහකාරියට මීට පෙර ප්‍රචණ්ඩ ක්‍රියා හෝ අපයෝජන සම්බන්ධ ඉතිහාසයක් තිබේදැයි පොලිසියෙන් තොරතුරු ඉල්ලා සිටීමට ජනතාවට අවස්ථාව හිමිවනවා.

එමෙන්ම, පවුලේ සාමාජිකයෙකු හෝ මිතුරෙකු පවුල් ප්‍රචණ්ඩත්වයට ලක්වීමේ අවදානමක් පවතින බවට සැකයක් ඇත්නම්, ඔවුන්ගේ සහකරු හෝ සහකාරිය පිළිබඳ තොරතුරු ඉල්ලා සිටීමට ද අවස්ථාව ලබාදීමට යෝජිතයි.

දකුණු ඔස්ට්‍රේලියා ප්‍රාන්තයේ 2018 වසරේ සිට ක්‍රියාත්මක වන මෙවැනි ක්‍රමවේදයක් ආදර්ශයට ගනිමින් මෙම නීතිය හඳුන්වාදීමට සැලසුම් කර තිබෙන බවයි පැවසෙන්නේ.

මීට අමතරව, පවුල් ප්‍රචණ්ඩත්වය හෝ ලිංගික අපරාධ සම්බන්ධයෙන් වරදකරුවන් වූ පුද්ගලයන් Dating Apps භාවිත කිරීම අපරාධ වරදක් බවට පත්කිරීමට ද Labor පක්ෂය පොරොන්දු වී තිබෙනවා.

මේ අතර, පිහිනුම් තටාක, ඇඳුම් මාරු කරන ස්ථාන, ප්‍රජා ක්‍රීඩා ස්ථාන, රෝහල් සහ වැඩිහිටි සත්කාරක ස්ථාන ඇතුළු තවත් ස්ථාන කිහිපයක Smart Glasses භාවිතය තහනම් කිරීමේ සැලැස්මක් ද ප්‍රකාශයට පත්කර තිබෙනවා.

Victoria විපක්ෂය ද මැතිවරණයෙන් ජයග්‍රහණය කළහොත් දින 100ක් ඇතුළත පවුල් ප්‍රචණ්ඩත්වය පිළිබඳ තොරතුරු හෙළිදරව් කිරීමේ ක්‍රමවේදයක් හඳුන්වාදීමට පොරොන්දු වී ඇති බවයි වාර්තා වන්නේ.