ඔස්ට්‍රේලියාවේ ප්‍රමුඛතම ගුවන් සේවා සමාගමක් වන Qantas සමාගම, සිය ආයතනික රැකියා 850කට පමණ බලපෑම් එල්ල විය හැකි නව ප්‍රතිව්‍යුහගත කිරීමේ සැලැස්මක් ප්‍රකාශයට පත් කර තිබෙනවා.

ජාත්‍යන්තර උපදේශන සමාගමක් වන Accenture සමාගම සමඟ වසර කිහිපයකට අදාළ, නව තාක්ෂණික හවුල්කාරිත්වයක් ඇති කරගැනීමත් සමඟ මෙම වෙනස්කම් සිදු කිරීමට නියමිත බවයි වාර්තා වන්නේ. ඒ අනුව, මුල් අදියරේදී Qantas සමාගමේ මූල්‍ය, භාණ්ඩ හා සේවා මිලදී ගැනීම්, මානව සම්පත් සහ අලෙවිකරණ යන අංශවලට මෙම වෙනස්කම් බලපානු ඇති බවටයි තොරතුරු සදහන් වන්නේ.

නව ගිවිසුම යටතේ ඇතැම් සේවාවන් Accenture සමාගම වෙත පැවරීමට නියමිත අතර, එම කටයුතු ප්‍රධාන වශයෙන් ඉන්දියාවේ සිටින එම සමාගමේ කණ්ඩායම් විසින් සිදු කිරීමට සැලසුම් කර තිබෙනවා. කෙසේ වෙතත්, ඇතැම් මෙහෙයුම් ඔස්ට්‍රේලියාව තුළම පවත්වාගෙන යාමට නියමිතයි.

Qantas ගුවන් සමාගමේ ප්‍රධාන විධායක නිලධාරිනී Vanessa Hudson සේවකයින්ට දැනුම් දී ඇත්තේ, සමාගමේ තාක්ෂණික පද්ධති නවීකරණය කිරීම, AI තාක්ෂණය භාවිතය පුළුල් කිරීම සහ ව්‍යාපාරික කාර්යක්ෂමතාව ඉහළ නැංවීම මෙම වෙනස්කම්වල අරමුණ බවයි.

මෙහි පළමු වෙනස්කම් 2027 වසරේ මැද භාගය වන විට ක්‍රියාත්මක කිරීමට අපේක්ෂා කෙරෙන අතර, සමස්ත ප්‍රතිව්‍යුහගත කිරීමේ ක්‍රියාවලිය ඉදිරි වසර කිහිපය තුළ සිදු කිරීමට නියමිත බවයි පැවසෙන්නේ.

මේ සම්බන්ධයෙන් බලපෑමට ලක්විය හැකි සේවකයින් සහ ඔවුන්ගේ වෘත්තීය සමිති සමඟ ඉදිරි මාස කිහිපය තුළ සාකච්ඡා පවත්වන බව Qantas සමාගම තහවුරු කර තිබෙනවා.

කෙසේ වෙතත්, එක් එක් සේවකයාගේ රැකියා සම්බන්ධයෙන් අවසන් තීරණ මෙතෙක් ගෙන නොමැති බවයි සඳහන් වන්නේ.

මෙම නිවේදනයත් සමඟ ඔස්ට්‍රේලියානු රැකියා අවස්ථා සහ සේවාවන් විදේශීය සමාගම් වෙත පැවරීම මෙන්ම AI තාක්ෂණය ඔස්ට්‍රේලියාවේ ශ්‍රම බලකායට ඇති කරන බලපෑම් යන කරුණු පිළිබඳ ව අවධානය යොමු වී තිබෙනවා